美國聯儲局每月買債規模再縮減100億美元，無疑是意料中事，但估唔到嘅係耶倫在退市態度上突然進取，取消同失業率掛鈎的前瞻性指引外，仲提出明年中或啟動加息，較投行預期明顯早得多，導致隔晚美元抽升，黃金急挫及美股偏軟。對於中國以及經濟唇齒相依的香港來說，過去幾年因為美國QE湧入的熱錢繼續流出，看來趨勢是無可逆轉。

比亞迪電子客戶包括蘋果及諾基亞等，可受惠市場的強勁需求。(資料圖片)

太陽日誌

大行預測比亞迪電子業績

基金要錢唔要貨

尋日滙控（00005）及中移（00941）分別跌到17及60個月新低，港股亦由頭隊到尾，恒指跌386點，收報21,182點，主板成交升至748億元，沽空佔大市比例升至11.55%，在在可見基金要錢唔要貨。

中移股價返回○九年水平，一來去年盈利跌5.8%至1,216億元人仔，差過大行估計的2至5%跌幅，第四季盈利301.97億元人仔按年更跌16%，但最致命係末期息僅派1.615港元，比舊年同期的1.778元少9.1%。

要知為肩負政治任務，中移小股東硬食天價發展TD 4G網絡的投資，早排中電信（00728）高管出嚟話將來4G服務費會低過3G，令中移完成一四、一五年固定投資高峰期後變番增長股的希望都成為泡影。

中移後市難樂觀

以3.311元股息及67元股價計，中移股息率4.94厘唔算好曳，但無增長兼碰正美國話要加息，除非國家可以畀急於四圍買profit的「雙馬」將成隻中移打包，否則橫睇掂睇，短期都無刺激股價大升的理由。

比亞迪（01211）發盈警，股價插14%。相反同系主攻手機配件的比亞迪電子（00285），食正3G及4G手機需求強勁，去年業績勁升71.1%，賺6.48億元人仔，比大行平均估計的5.47億元人仔足足多一成八。

高端智能手機有趨勢將更大比例使用金屬機殼，公司PMH技術加上本身客戶包括蘋果公司、諾基亞及摩托羅拉等主要智能手機玩家，而蘋果公司事先張揚今年會推大屏幕一體化手機，相信智能手機相關生產商都會受惠。

昨日以大成交高開低收，似係大戶趁業績出貨，以一四年市盈率12.2倍，如果回到4至4.5元之間，可以諗吓慢慢儲貨，等下半年iPhone6登場。