被政府狠批鐵路項目招標表現唔積極、過去三年「零批地」嘅港鐵（00066），响本財政年度就快完結前，終於有動作。今日就將軍澳日出康城第四期純住宅項目，邀請發展商遞交發展意向書。市場人士估計，未來將軍澳區供應多，加上市況低迷，項目每方呎樓面地價或低見2,000元，估計地價最高約32.9億元，項目可能會以類似天榮站嘅變相「一口價」招標形式吸引發展商。

將軍澳日出康城第四期純住宅項目今招意向，新地副董事總經理雷霆表示會遞交意向。

日出康城第四期資料

港鐵嘅日出康城第四期項目今日起招收意向書，下個星期三下晝兩點截止，項目提供4幢住宅大廈，提供1,600伙住宅單位，地盤面積則約139,967方呎，總樓面約1,316,483方呎，預計二○一九年落成。

每呎樓面地價料二千

對上批出發展權嘅第三期已經係○七年，事隔幾年再有新期數推，劉Sir即刻搵發展商老友問下有無興趣，新地（00016）副董事總經理雷霆話會遞交意向；而長實（00001）執行董事趙國雄就話地皮位置佳、潛力好，應該會入意向。

理想城市張聖典話，日出康城仲有啲期數陸續推出，而依家區內二手樓做緊嘅實用呎價約7,000至8,000元水平，價錢相對市中心較弱，加上外圍有加息隱憂，同之前大埔白石角流標事件，佢話政府作為港鐵大股東，兩方面都會有啲壓力，估計今次分紅利潤計算上唔會太進取，佢預計每方呎樓面地價約2,000至2,500元。

事實上，發展局局長陳茂波上月底公布新財年賣地計劃嗰陣，已指摘港鐵近三年無項目成功批出，點名批評需要再努力，以配合政府供應嘅目標進度。

睇番過去曾經推出嘅天水圍天榮站同大圍站項目，基於補地價同出價低，導致流標出現，為免再重蹈覆轍，市場相信港鐵今次會用各種辦法去吸引發展商。

南區屯門住宅地招標

另外，今日截標之一嘅馬鞍山白石住宅地皮，已先後至少有4個測量師行調低估值，降幅普遍達一成或以上，每方呎樓面地價約4,000至6,450元。

另外南區壽臣山道同屯門井財街兩幅住宅地皮亦於今日起招標。