歐盟同美國先後宣布制裁一批俄羅斯官員，但都係擺姿態居多。魚缸反應亦好理性，日股高收，滬綜指靠穩，港股在21,500點水平徘徊，收報21,583點，升109點，主板成交648億元。相信任何大動作，唔爭在等埋美國聯儲局會議結果先至算，而阿莊仍傾向相信，月底結算前恒指有機會下試上月低位21,197點，故宜以靜制動，唔好心急撈貨。

蒙牛透過引入海外同業合作，有助提升技術並加快搶佔市場。（資料圖片）

包括互聯網、軟件及支付概念等科網股本輪整固似乎話咁快搞掂，騰訊（00700）反彈5%、金蝶國際（00268）及擎天軟件（01297）同升逾一成、中國創新支付（08083）急升逾兩成、神州數字（08255）亦反彈12%。

支付股實力待驗證

事實上，內地要推動互聯網金融及電子商貿等發展，拓展網上支付系統係少不得的環節。大概人行係要搞清楚條例，做好監管者的本份，而非要阻撓行業發展。但當然，到底相關概念股份中，邊隻先至真正成功開發業務，邊隻只係博大霧跟炒，缸邊友要懂得分辨，畢竟呢類股已累積一定升幅，高位波動甚大，沾手真係要膽博膽！

近日人行宣布擴大人仔兌美元匯率波幅，惹來唔少猜測，其中一個睇法，乃上大人變相容許人仔貶值的背後，劍指內房泡沫。隨着銀根持續偏緊、內銀房貸政策從嚴、炒作人仔升值的熱潮退卻、反貪腐令地方政府財政透明度增加，國有資金非法流入炒作地皮的情況大大減少，意味內房產業資金鏈備受挑戰，人仔貶值將加速資產價格調整，若然今年上半年內房銷售表現遠遜預期，板塊危機將可能在下半年或明年首季爆發，到時有房企倒閉亦不出奇。

過往，磚頭股吸納不少長錢坐貨，但今年大環境不利，資金要另覓出路，也許消費類股份是相對穩陣的板塊。乳業改革利好大型乳企發展，一向睇好的蒙牛（02319）去年股價表現不俗，由低位翻了一番。阿莊認為，如今內地乳企缺乏的不是國策支持，而是生產技術的提升及產業一體化的建立，呢方面海外同業已有豐富經驗，透過引入海外同業進行戰略合作，是乳企加快改革、搶佔市場的最便捷途徑。

蒙牛上月宣布以每股42.5元向達能亞洲配股集資半百億元，相關議案將於明日召開的股東特別大會審議，另公司將於下周二宣布年度業績，此刻不妨留意進場機會，博消息帶動股價再試衝五十二周高位41.5元。走勢上，蒙牛現價正處自去年首季開始的升軌底部，同時亦在保力加通道底部見支持，近日14日RSI開始止跌回升，博短線技術反彈亦可。