舊年本港主要零售核心區街舖租戶大執位，其中受內地遊客追捧嘅鐘錶珠寶金行等商戶，大舉進駐尖沙咀廣東道，以租賃金額計，喺條街佔有比例高達47.7%，按年大升18.7個百分點。至於佢哋前年曾積極搶佔陣地嘅銅鑼灣羅素街，舊年所佔比例就由71%，大跌至36.1%。

受內地遊客追捧的鐘錶珠寶金行等商戶，去年大舉進駐尖沙咀廣東道。（資料圖片）

去年尖沙咀廣東道地舖租戶比例

去年銅鑼灣羅素街地舖租戶比例

劉Sir收到暉煌物業一份報告，詳列舊年主要消費區街舖租戶變化。若果以租用金額計，佔比例愈大，就愈肯以大筆租金搶租舖位，其中鐘錶珠寶金行商戶舊年喺尖沙咀廣東道勝出，所佔比例高達47.7%，而佢地前前年只係佔有29%。

羅素街搶位縮至36%

而前年佢地喺銅鑼灣羅素街曾高佔71%，舊年跌到得番36.1%，打破喺銅鑼灣擴軍嘅習慣，反映佢地已經轉移陣地，改為多喺租金平啲地區落腳。

暉煌物業董事－商舖部鄺富貴（Felix）話，隨住內地旅客來港購買中價鐘錶的數量日多，料鐘錶珠寶金行更減少到銅鑼灣等核心零售區以「天價」租金搶租舖位，反而會於租金相對較低的九龍區承租更多舖位，以密集形式擴充。

至於大型鐘錶珠寶金行大減下，羅素街舊年就畀服裝店舉進駐搶盡風頭，由唔上榜到高佔30%。Felix話，意大利潮流服裝品牌Prada預租羅素街2000年廣場地下及1樓舖位等樓面，月租金約800萬元，以總面積約1.5萬方呎計，呎租約533元，單係呢單大租，等同條街六、七間舖月租，所以以租金比例計，舊年條街服裝類行業比例大升至30.2%。

呎租千六元算「筍」

Felix話，內地客多咗到香港買中價鐘錶同金飾與日用品，羅素街地舖舊年平均呎租約1,944元，相比之下，廣東道平均呎租只約1,658元較平。

另外，近年內地旅客多咗去旺角西洋菜南街消費，當中不少係大部分不過夜，化妝品店同蔘茸藥房最受歡迎。

以租用數量計，該類商戶舊年所佔比例高達42.9%，較前年大升21個百分點，而鐘錶珠寶金行都只係佔21.4%，比前年嘅18%，只上升3.4個百分點。