恒指經過上周三至周五累積約730點跌幅後，昨日反彈依然乏力，跌65點，收報21,473點，主板成交縮至557億元，比上周五足足少兩成六。即月期指日市收21,393點，成交4.52萬張。

恆指期貨走勢

基於本周聯儲局議息可能延續退市步伐，再縮減每月百億美元的買債規模，市況膠着是預期以內，故索性等議息後再諗入市。不過，昨日指數跌勢其實比預期溫和，單睇騰訊（00700）佔恒指61點跌幅，撇除後大市其實不過幾點上落，可見觀望氣氛極濃，至於無騰訊因素影響的國企指數則升34點，收報9,333點。

淡友經過一輪急攻後，留低三個下跌裂口（嚴格上22,019至22,198算是補回），嚴重超賣下唔排除先抖抖氣，但21,197至22,986點反彈浪升幅的0.236，即21,619點亦都守唔住，再試21,197點雙底支持恐怕只係遲早問題。

睇埋內地兩會後難有好消息刺激股市，退市下美股亦有短期見頂迹象，博反彈的風險同回報不成正比，筆者傾向等反彈再沽，多過冒險博反彈，下移中的10日線去到22,181點，與今浪的0.5反彈阻力22,092點接近，一於等機會再沽過。