匯市由年初至今，仲未搵到一個主題去炒。本來今個星期聯儲局議息，係耶倫第一次以主席身份坐正主持會議，又喺會後記者會發表一下對經濟前景例如就業、通脹等睇法，亦都有誘因去炒聯儲局會唔會搬龍門修改前瞻指引的門檻。不過，忽然變咗一件無關痛癢的小事，除非耶倫轉軚先有好戲睇。

紐元兌美元走勢

耶倫由主角變配角，因為呢幾日焦點就係人民幣擴大浮動範圍至2%，有利出口但對外債多的公司似乎不利。而且克里米亞公投對烏克蘭、俄羅斯或西方之間的角力仲繼續發酵緊，有傳言話星期四歐盟就決定點樣制裁俄羅斯，令到黑海局勢緊張非常，避險情緒又再升溫。

至於商品貨幣近日反彈緊，其中新西蘭央行上周加息，最重要係暗示嚟緊會進一步加息至一七年，宣布開始加息周期。識炒外匯的，一定知加息預期係匯價升跌好重要一環，預期聯儲局上半年前都無條件講加息，策略上逢低買入係最安全做法。

不過，都要留意幾樣嘢，第一，如果未來環球經濟真係放緩，可能令新西蘭改口風都唔定。第二，留意澳元兌紐元交叉盤，1.0440係○五年低位，亦係近20年低位，如果澳元太弱紐元太強，對新西蘭出口絕對不利，所以紐元要升，都要求神拜佛澳元短期內唔好跌，預期紐元呢個星期繼續喺0.8450至0.8600高位整固機會較大。