內地股市靠穩，港股本來可以抖抖氣，點知午後又有飛機沽盤殺到，最終恒指低收65點作結，報21,473點。美國議息前市況觀望，大市成交僅557億元。炒家撤離新興的科網同支付概念股，部分回流傳統股份如水泥及電力股。但阿莊認為，產能過剩行業依然唔掂得，短炒相關股份提防隨時接火棒。

受惠港澳兩地新推工程及內地保障房動工，今年中國建築的利潤前景樂觀。（資料圖片）

明眼人都知，本來預計在阿里來港上市前科網概念會瘋炒，之後泡沫就會隨着阿里以超高估值登陸港股後而爆破。若然本地監管機構開綠燈，無錯今年港股集資額唔使愁，投行亦有大刁做。但問題係，一旦泡沫爆破，最終監管當局要背上黑鑊，還因開了先例而後患無窮，故不為短錢改變立場亦非毫無道理，只有嘆句無緣。

手頭合約唔憂做

再睇番國策股，中國建築（03311）去年度業績對辦，營業額按年增24%至271億元，純利增30%至27.72億元，毛利率擴闊1.3個百點至13.7%，計落現價往績市盈率16倍，息率2厘。

年內，公司取得28項新工程，應佔合約金額455億元。展望今年，港澳建築市場新推工程量、就業率及利潤預期均傾向樂觀，內地保障房有望開工700萬套以上。今年首兩個月公司新承接項目達14項，合約額211億元，截至二月底止在手總合約額約1,354億元，其中未完成合約額為913億元，同比增四成，足夠未來三年建造。

橫睇豎睇，呢隻股盈利前景能見度高，屬穩健之選。走勢上，其股價由一一年末季低位3.42元，反覆升至去年底所創的歷史高位15.2元，本月股價失守250日線，上周低見11.3元，14日RSI落到22，技術上極度超賣下，尋日反彈4.7%，收報11.96元。

回顧呢個大升浪，曾於一二年五月中旬失守過250日線，但不到一個月收復並延續升浪。兩手準備，預計短線反彈在250日線12.5元有阻力，或再次下試上周低位11.3元，若守穩其上，中線可先下首注，待確認重上250日線再加注。

保守假設一四年盈利增長兩成，以一四年預測市盈率16倍計，合理價13.6元。不過，若在極端市況下股價失守上周低位，則可待回落至10元邊先至入場。