兩會曲終人散，基金經理只睇見李總理向環境污染宣戰，但睇唔到用乜方法達到GDP增長7.5%的目標，尤其是兩會期間公布的經濟數據，由二月份出口及銀行新增貸款，到尋日曝光的社會消費零售、工業增加值及固定資產投資，都比預期差，俗語話有懷疑最好揸現金，除咗掟貨之外，試問依家仲有乜動作好做？

雖然本地地產股估值已相當低殘，但仍未提起基金買貨意欲。（資料圖片）

太陽日誌

尋日午市幾個內地數據公布後，魚缸最後一個好友都再頂唔順，若非A股死雞撐飯蓋升1%收市，段估恒指跌幅唔止145點咁少，收報21,756點，總成交701億元。唔單止騰訊（00700）終於失守600元大關，跌2.3%，報588元，唔少當炒股亦隊得頗誇張。

阿里巴巴入股後，周三高開低收殺盡散戶的文化中國傳播（01060），再隊低11.4%，收報1.62元，前日唔好彩3.39元高位衝入去如果仲未逃生，帳面經已輸超過五成。

雙馬概念只宜小賭

不過話說回頭，閣下如果係騰訊及阿里巴巴掌舵人，眼見股市及私募基金陷入半瘋狂，俾六、七十倍PE買你公司印的公仔紙（私募基金的非上市股份最新報價，阿里整體價值升到1,500億美金，相當於1.17萬億港元），你會點做？

講到底，最好利用極高的股份溢價，直接出去買earning（盈利）番嚟壯大自己份成績表，就算畀到三、四十倍PE買嘢，仍係除笨有精，實行玩到爆為止，至於最後得唔得閒逐間湊大買返嚟嘅公司，就係另一回事。所以對於喜歡衝着雙馬概念去豪賭的股民，筆者嘅建議係有閒錢兼有心理準備隨時total loss的話仲可以諗吓，賭大錢就真係咪搞！

樓市唔跌辣招唔撤

大埔白石角地皮，在包括幾間本地主要發展商在內的七間地產公司都有份入標下，最後因達唔到政府心目中的底價，流標收場。基於特區政府首要任務是處理高價樓問題，一方面話增加土儲供應、提升未來建屋量，一方面又出現唔到價流標，都真係幾令人意外。當然，點都唔夠坊間吹風，話標書最高出價只係29億元，樓面呎價不足4,000元，比○九年鄰近地皮低45%咁驚嚇。

毫無疑問，雙辣招下去年大發展商賣樓進度受阻，短期唔怕無貨買，對補充土儲的胃口自然減少，加上比鄰信置（00083）的新盤去貨唔算太理想，都影響其他發展商踩隻腳入白石角的信心。美銀美林報告話，今次流標對信置影響相對較大，亦都維持今年樓價跌一成，明年再跌一成至一成五的悲觀預測。

目前恒生地產分類指數成分股，市帳率約0.7倍，多少可見股市有晒樓價要跌的心理準備。睇番過去廿年，市帳率低於0.7倍樓下的，除今次之外，仲有九八年亞洲金融風暴、○三年沙士及○七年次按風暴（最低是九八年時的0.63倍）。

除非內地經濟及政治局勢急轉直下，否則筆者相信地產股已充分反映美國退市、利息上升的不利因素，可惜是政府已擺出樓市唔跌，辣招唔撤的姿態，就算地產股股價已經好平，對於基金經理而言，都仲係無真金白銀入市吸納的充分理據。