內地旅客嚟香港血拼都會首選港島銅鑼灣，難怪該區舖位愈搶愈貴。繼日前波斯富街有舖位以天價賣咗之後，尋日最新收到勿地臣街雙號一個地舖亦連租約以3億元賣咗，呎價去到37.5萬元，有機會創條街舖位呎價新高。有代理估計，今次個價咁理想，有可能係涉及舊樓重建收購。至於今年到依家為止，銅鑼灣已經有至少三宗逾億元零售物業成交，金額加埋已超過10億元。

銅鑼灣勿地臣街一帶的舊樓地舖，鄰近時代廣場以及羅素街，極具重建價值。（資料圖片）

今年銅鑼灣逾億元舖位成交

自雙倍印花稅辣招舊年推出後，市場過億元舖位買賣都少咗好多。不過，銅鑼灣近排就連錄多宗大刁成交，相信最大支持原因應該係近年撐起香港消費市場嘅內地旅客。

劉Sir收到風，上述勿地臣街雙號地舖啱啱以約3億元售出，舖位建築面積約800方呎，計起上嚟呎價比條街平均做價高約五成，可見新買家都好進取。

有代理同劉Sir講，過去約九年左右，上址樓上大部分住宅及地下舖位都陸續錄得買賣成交，依家剩低多個住宅未賣，由於條街好近時代廣場同羅素街，日後重建發展潛力極高，所以唔排除今次係屬於重建收購。

赫德道全幢或改拆售

日前附近波斯富街77至83號地下N舖，以約1.8億元售出，呎價達約90萬元，有機會係全球街舖呎價最貴，足見市場都睇好銅鑼灣舖位後市。

近月銀座式商廈有價有市，華懋原本全幢叫價約5億元放賣嘅尖沙咀赫德道16號全幢商用物業，依家諗緊逐層拆售，呎價約1.6至4.8萬元左右，較全幢每方呎大約兩萬元吸引，每層涉資約1,900至超過9,000萬元。

億京葵涌工廈錄蝕讓

辣招下，工商物業短炒銳減，唔少要壯士斷臂，輸少當贏。

代理話，億京發展嘅葵涌青山公路葵涌段403號工廈重建項目，近排陸續通知買家收樓。

但部分睇唔好後市嘅買家趁上會前已蝕讓離場，其中有個中層戶，早前以650萬元「摸出」，呎價約3,300元，原業主持貨一年多帳面損失約140萬元，蝕幅約18%。