滬綜指再失兩千點關，港股亦跌穿22,000點，真係同病相憐！昔日火車頭中移（00941）失威，尋日跌到落70元關見有五百多個買盤出嚟護航，點知不堪一擊，全日低位見69.85元。目前中移股價正在反映去年度業績遜色、4G資費趨跌，以及科網企業高速發展帶來挑戰等因素，是浪跌穿一一年低位68.05元的機會大，暫不宜急於撈底。

內地文化旅遊產業改革醞釀起步，中旅本身的優勢將得到體現。（資料圖片）

尋日魚缸焦點，乃復牌的文化中國（01060）。呢隻股阿莊都提過好多次，本來諗住騰訊（00700）入咗股，炒上去頂多係同騰訊有關，點知會係阿里巴巴斥幾十億元入股做大股東！獲兩大紅人睇中，難怪復牌後股價爆升，全日高位見3.39元，收報1.84元，升1.85倍，成交55億元，成交額僅次於騰訊！

文化中國風頭勁

經過中信21世紀（00241）同文化中國如同被「皇袍加身」後，如今缸邊友都想尋找下一個幸運兒。老實講，阿莊睇隻文化中國大大話話已有兩、三年，若然一路持貨冇走都咪話唔閉翳，能夠等到尋日，真係抵佢贏錢！

內地限於意識形態同官方立場，過去幾年一直未能有效推動文化產業改革，但人民富起來，文化產業是生活的重要部分，亦係推動內需的有效途徑，遲早都要開放改革。睇呢個格局，似乎阿爺選擇在進一步開放前，由兩大本土科網巨企領軍整合，一來肥水不流別人田，二來一切在掌握之中。

想到呢度，又令阿莊想起隻中旅（00308），本來在內地旅遊業發展方面極具優勢，旗下芒果網亦好有發揮空間，股價幾時先至「甦醒」？同中信21世紀及文化中國「發迹」前一樣，信的就繼續耐心等吧！

晨訊科技現強勢

繼續睇吓二、三線股，尋日見到晨訊科技（02000）逆市向上，收0.43元，升7.5%。論本業，晨訊從事製銷顯示模塊、手機及解決方案，近幾個月相關業務收入一直在跌。要炒，亮點相信在於旗下瀋陽商住物業項目，以及在江蘇泰州與一光伏專業公司合作發展當地一個「物聯網新能源示範小區」，共同發展物聯網及新能源發電站。

再睇走勢，今年以來，其股價底部不斷上移，月初10日線一度失守50日線，但本周成功重返其上，金叉再現，MACD亦現雙牛利好，若交投維持，可小注一試。