上星期市場焦點被烏克蘭緊張局勢搶晒鏡。今次炒避險，匯市其實靜到不得了，單睇隻美元兌日圓呢隻傳統避險貨幣，連101都未跌穿就止跌回升。

其實炒避險，除了買避險貨幣，仲可以沽空風險貨幣如澳元同紐元，但這兩隻貨幣兌美元跌都唔跌 !

澳洲央行日前議息，息口續維持不變，看來減息周期已完。但央行都有提到以歷史水平睇，依家匯價仍然偏高，但短線連意外炒避險都令澳元跌唔落，故上半年澳元有機會維持低位整固。

再講澳洲第四季國內生產總值按年增長2.8%，大幅高於前值，更加令澳元淡友未有誘因要沽，預期澳元將繼續反彈，目前支持位已經上移至0.887，止蝕位宜設於此位下方，至於阻力明顯見於0.917及0.927水平。

不過，炒反彈最重要係見好就收，澳元暫時仍未有扶搖直上的條件。筆者建議沽澳元要等新誘因，價位暫時睇住0.907甚至0.917先至重新入市。