俄羅斯鳴金收兵，油金價回落，華爾街三大指數向好，前晚標普五百指數更創歷史新高，道指升227點，收報16,395點，十年美債息急彈番去2.69厘收，回到上周五烏克蘭局勢緊張前水平，一切當無事發生一樣。

騰訊升勢愈來愈急，跟進者宜做足止蝕準備才好上車。（資料圖片）

太陽日誌2014/3/6

券商預測老恒和業績（人民幣）

瞓醒見美股狂升，以為港股有運行的，一定失望到極。尋日恒指高開181點後，升幅愈玩愈縮，午後更走樣，最多跌128點，收市跌77點，報22,579點。

總理李克強的首份政府工作報告，將今年GDP增長目標定於7.5%，幾乎是街外大行預測的上限水平，並把環境染污視為頭號敵人，要同「污染宣戰」，計劃包括推動太陽能發展、淘汰舊車、實施大氣污染防治行動、以及加強水資源保護和推進重點流域污染治理等。

股市愈趨兩極化

今個周末股市形勢都幾微妙，周五晚美國公布二月就業數據，係聯儲局月中議息前最後亦最重要的退市參考。加埋星期六，中國二月出口數據出籠，一月爆冷升10.6%之後，人人都估二月因為春節關係會放緩。唔想好似去賭場買大細的，減磅係預期之內。

股市愈來愈兩極化，銀行、保險及工業股等實體經濟企業，平到無人吼。另一邊廂，位高勢危，估值開始見泡沫，但有國策配合的新能源及環保股，貴貴都有基金去搶，加埋馬雲以音樂椅遊戲指揮身份出現，音樂一日未停（阿里正式宣布上市），市場認為網絡股炒風都唔會咁快完。

睇騰訊（00700）○九年七月躋身紅底（100元）股，之後花咗一年零廿六個星期升至200元，去300元耐些少，用咗兩年零十七個禮拜，時為一三年五月。

之後阿里巴巴上市消息，令網股好似食咗類固醇一樣，騰訊每升100元需要的時間亦愈來愈少，花114日去到400元，再經111日去到500元，而到600大關只用咗58日。照咁推算落去，難怪會有人話騰訊四月見700元。筆者唔會阻人發達唱反調，但都係果句，要預咗尾注輸番出去，同埋自問肯止蝕先至好上車。

老恒和值得落注

半新股老恒和（02226）一月以7.15元招股上市，凍結資金過千億，二月中開始，股價一直在9至10.32元之間上落，尋日仲重上10元樓上，反映基金收貨都收得好乾吓，如果想買又未買，似乎可以先放一注落去，免得佢股價好似放紙鳶一樣追唔番。

老恒和主要生產煮食用料酒，亦有醋及醬油等廣泛在中菜中採用的調味料，儘管品牌歷史可以追溯近一個世紀，但公司上市前業績並不算特別標青，一二年盈利低於1億元人民幣，上市集資主要用作擴充料酒的生產設施，以及採購釀酒所用大米，以配合提高產能之計劃。

基金向來特別偏愛擁有品牌的內地消費類股份，老恒和缺點是上市日子有限，但優點是盈利基數低，同熟悉的副食品商好似旺旺（00151）、統一（00220）及康師傅（00322），預期市盈率達22至38倍相比，老恒和估值唔貴，街外預測一四年17.7倍，未來兩三年是其增長高峰期，股價作勢破位，有網股恐懼症不妨留意吓佢。