呢幾年內地旅客少咗喺香港掃高價鐘錶珠寶，少咗商戶肯用高租金搶核心區舖位。响過去三個月，旺角、尖沙咀及銅鑼灣有唔少舖位成交租金加幅略高於約4至30%，比起舊年呢幾區舖位租金增幅由約四成至超過1倍，舖位租金升幅明顯放緩。其中尖沙咀亞士厘道九龍中心有個舖位啱啱續租，新租金每月約4.8萬元，升幅只有4%多啲。

有傳連鎖時裝店早前續租旺角西洋菜南街舖，租金升幅顯著放緩。

過去三個月核心區舖租升幅放緩個案

近幾年香港零售核心區商戶生意唔少都係靠內地高消費旅客，好多大商戶都出高租搶心儀舖位。

以舊年為例，主要消費區舖位租金升幅一般都有四、五成。銅鑼灣羅素街同埋尖沙咀廣東道等街舖租金升幅甚至超過1倍。不過，隨着鐘錶珠寶等高消費品消費減少，核心區舖位租金升幅罕有出現單位數字。

劉Sir收到風，上述亞士厘道九龍中心地下部分，面積約4,740方呎，餐廳原本以每月約4.6萬元租用，早排以每月約4.8萬元續租，呎租約10元，續租租金只升逾4%。

藥房租景隆街 出價理性

另外，原由電訊公司租用嘅同區加拿分道16號地下E舖，畀間鐘錶店以每月約33.6萬元承租，以面積約800方呎計，呎租約420元，較前租金僅升近20%。

雖然旺角西洋菜南街依家冇吉舖，但租金都升唔起，聽講連鎖時裝店Bauhaus早排續租咗銀城廣場地下G06號，月租約118萬元，以面積約1,700方呎計，呎租約690元，租金升幅約20%，相對舊年條街有化妝品店續租租金升幅達1倍，明顯少好多。

舊年藥房好勇搶租旅遊區地舖，不過近排「出手」就理性咗，有藥房就租咗銅鑼灣景隆街單號地舖，面積約450方呎，月租約23萬元，呎租約510元，租金升幅約15%。

玩具大王7億掟物業

另外，由「玩具大王」蔡志明等持有嘅百寶利商業中心地下10及11號舖及1至3樓與有關零售物業，剛以約7億元售出，平均呎價約3.5萬元。