業主個個肯減價，即刻「谷起」二手買賣交投，唔通真係樓市小陽春乍現？好似將軍澳區，今個月頭四日已經有29宗二手買賣，比上個月同期多成4.8倍，新都城有個三房單位成交價唔使500萬元。另馬灣珀麗灣上個月成個月都只得9宗買賣，但今個月頭三日已有6宗成交。

近日不少將軍澳區業主願意減價，全區二手交投回暖。（資料圖片）

二手樓買賣反彈一覧

美聯馬立成講，近期唔少將軍澳業主都肯減價，令到全區二手交投即時多番，今個月頭四日就已經有29宗買賣，比上個月同期得5宗，或者一月份同期12宗，交投都明顯增加。

太古城日日有單開

近排個價當然有跌，好似新都城2期2座低層H室，啱啱賣咗488萬元，三房單位唔駛500萬元，實用呎價約9,071元；另天晉8座低層D室，減價27萬元，賣咗573萬元，實用呎價只係1.08萬元，屬低市價。

劉Sir再問下其他老友，原來好多區交投都多番啲。美聯熊建明話，珀麗灣今個月頭三日就有6宗買賣，有用家以950萬元一口氣買入16座中層A、B室。

至於鰂魚涌太古城亦平均日日有成交，中原趙鴻運話，屋苑華山閣中層B室，減價52萬元，以848萬元賣出。

嘉湖7客爭睇貴賣

中原黃惠霞講，荔枝角美孚新邨首三日有5宗買賣，其中5期恒柏道1號極高層B室，減價25萬元後，賣515萬元，約兩年升值21%。

祥益蕭嘉偉話，該行兩日之內，喺天水圍連環促成4宗居屋同4宗私樓買賣，其中嘉湖山莊賞湖居1座中層有裝修單位，放盤後淨係該行都有成7組客睇過，最後賣咗303萬元，仲高過部分銀行嘅估價。代理話，奧運站一號銀海5座中層A室連約賣1,945萬元，同類單位之前無2,000萬元唔使諗。

交投多番絕對唔出奇，事關有啲業主即使蝕讓都要套現。代理爆料，大圍名城3座北翼中層單位，一○年買入價902萬元，依家以825萬元賣出，實用呎價1.12萬元，帳面蝕77萬元。

居屋市場表現就一般。美聯講，將軍澳安寧花園2座中層J室，上月自由市場賣360萬元，最近個客撻咗訂，單位依家再放盤，叫價都係360萬元。

另一方面，世紀21奇豐報料，沙田愉田苑K座低層7室，以居二價320萬元賣出，低市價足足10%。