本來諗住歐洲央行議息前，市場有興趣炒減息令歐元回調，不過竟然殺出一個程咬金。歐元一度跌至半個月以來低位，不過上星期五出現急升，市場解讀為通脹數據救咗歐元一命！

歐元兑美元走勢

二月份歐元區CPI初值上升0.8%，暫時紓緩咗歐元區通脹進一步下跌同埋陷入通縮嘅風險，弱化今個星期歐洲央行議息會進一步寬鬆嘅預期，亦再次證明央行行長德拉吉拍心口話無通縮風險嘅言論繼續有效。

不過0.8%嘅通脹，遠低於央行目標2%，再加上歐元區失業率仍然接近歷史高位12%唔肯回落，睇嚟歐洲暫時未有辦法有效增加職位，歐元再強對進一步刺激歐元區復甦似乎無甚好處。

當日另一炒上歐元嘅誘因，就係美國GDP大幅向下修正至只有2.4%，歐元區「好」數據同美國「壞」數據，自然將歐元挾上，創下今年新高。不過唔駛咁驚住，過去數月從零售銷售及消費者開支等數據放緩，已預知GDP有向下修正的心理準備，而且今年先剛剛過咗兩個月，唔好畀「今年新高」四個字嚇親，要升穿舊年十二月二十七日高位1.3890仍有難度。

今個星期歐洲央行議息仲有美國非農業新增職位，焦點仍集中在星期尾段，對歐元看法仍難樂觀，未有扶搖直上的條件，宜做淡，以去年高位為止蝕控制風險，目標先看1.3640，最終目標1.3520。