俄羅斯出兵克里米亞的消息，令尋日金融市場立立亂，俄羅斯央行配合行動突然挾息，把指標利率由5.5厘調高到7厘，本身已經積弱的俄羅斯貨幣盧布，兌美元跌至歷史新低，俄羅斯股市開市急插一成，加埋北韓領導人趁亂玩試射導彈，尋日成個市就咁畀兩單新聞玩殘。

來自內地物業項目增長強勁，帶動長實全年業績理想。(資料圖片)

太陽日誌

外圍散晒，恒指跌336點，收報22,500點，主板成交比上周五縮近百億至668億元，上升及下跌股份分別有513及892隻。講真，個市跌得比筆者預期少。

值得留意，部分基金帳面盈利極為豐厚的outperformer，好似澳門博彩股喧，在二月博彩收入報復式回升的消息公布之後，股價一抽高隨即被大孖沙質到尾，唔係太好兆頭，尤其係聖誕及新年的賭客高峰期已過，三、四月打後，博彩收入季節性進入平淡期，總之就有胡唔食，罪大惡極。

電池股仲有得炒

尋日先講過，連預測PE過百倍嘅比亞迪（01211）都敢買，更何況一堆業績無睇頭的充電池股？結果升幅同鑊氣成正比，中聚電池（00729）狂升37%，收報0.74元，光宇（01043）升9.3%，連久不發市的飛毛腿（01399）都升5.8%，收報0.54元，可見個市真係相當缺乏炒作故仔，估計幾隻三四線電池股短期仲未玩完。

高鑫零售（06808）去年業績增長15%，至27.75億元人民幣，去年毛利率則微升0.9個百分點至21.6%，同店銷售增長則放緩1.3個百分點至僅2%，可見中央打貪，即使並非直接衝擊走中低價特賣場路線的大潤發，但零售市道差咗，對佢唔多唔少都有影響。

補倉盤挾起高鑫

以股論股，高鑫又確實比其他內地零售股標青，但接近30倍PE亦都貴絕同行，尋日股價報復式上升7.1%，收報9.45元，說穿了，只是去年底股價由13元樓上級級落的一次修正。心水清的可能留意到，近幾個月高鑫沽空金額一直唔嘢少，好似上星期業績前，日日過千萬，最勁係上周四、五。

尋日見瑞銀報告估算，借高鑫沽空的累積空倉可能達到街貨一成，或者等於22日平均成交量。睇到呢度，相信大家多少都估到，是次升浪好可能係來自補倉買盤，而並非睇完份業績覺得抵買。

長實（00001）以及新地（00016）份成績表比市場預期理想，但碰正跌市都無計，股價分別跌0.7%及2.6%。辣招底下，香港樓市一池死水，兩個地產商今次都係靠內地項目食胡。

長實份全年業績及新地的中期業績，來自內地物業項目的貢獻分別升20%及158%，至60億及36億元，相當於兩間公司EBIT的31%及24%，公司負債比率分別係2.3%及12%，不過大行提出如果將新地投得的上海地皮計入在內，實際負債比率18%。

除非啱啱向股東以十二股送一份、行使價98.6元的紅利認股證全部被行使，集資222億，負債比率先至返到12%左右。暫時睇，賓架對紅利認股證譭譽參半，但大都表示意外，一來新地上個月至發債集資，大股東三兄弟又啱啱完成股份分配，時機上真係敏感少少。二揀一，顯然旗下和黃（00013）準備將零售業務分拆上市的長實，被重估的空間較大。