三月份多個全新樓盤排住隊等開售，部分發展商趁全新盤埋身肉搏前，積極重推旗下新盤餘貨。好似恒地（00012）等嘅馬鞍山迎海第一期，尋日截止收票，有成392張入票，超額認購6.8倍，相信賣完嗰50間，發展商會盡快推埋剩番嘅單位。另外，長實（00001）北角DIVA就推出低至全期最優惠利率（P）減3厘嘅低息二按計劃，吸引用家入市。

多個新盤本月即將開售，長實北角DIVA推出二按付款優惠計劃吸用家。(資料圖片)

迎海第一期獲超額認購近七倍，反應熱烈。

三月份新盤最新動態

恒地發言人同劉Sir講，旗下迎海第一期尋日晏晝截止認購登記，即晚抽籤，而項目今日發售嗰50個單位，最終收票392張，超額認購6.8倍，而呢批單位呎價1.1萬幾至1.45萬。

二按最長可借20年

同系嘅西半山天匯，一個33樓B室就賣咗1.3億幾，買家係香港永久居民，所以享有發展商提供嘅售價4%折扣等一籃子優惠。

另長實嘅DIVA已經賣咗60伙，佔可售單位近八成，發展商套現約6.4億，雖然項目尋日取消咗其中兩個有樓價5%折扣優惠嘅付款計劃，但就同尚乘集團合作，推出「SUPER二按付款計劃」。

今個月七日開始，頭十個用「Super二按即供付款計劃」或者「Super二按建築期付款計劃」嘅私人名義買家，除咗可以享用到「二按供款津貼」嘅額外售價5%折扣優惠外，仲有二按息率低至全期最優惠利率（P）減3厘嘅超筍優惠，二按最長貸款年期可以去到二十年，而買家首期仲可以低到樓價兩成。

高士台短期或加推

至於首次賣開放式一房單位嘅港島西區高士台，發展商嘉里建設（00683）就話，尋晚六點開始抽籤，20個單位隨即全部獲認購，並考慮短期加推新一批單位。

至於宏安地產嘅長沙灣薈悅有4伙加價，加幅2.4至3.5%，加價單位將於周五發售。另西營盤懿山修訂樓書及價單，其中26至29樓全層戶，以及頂層複式戶齊齊「縮水」，面積較之前公布少約53至411方呎。