短期美國經濟有如被大霧籠罩，上周五美國公布修訂後第四季度GDP，由初值3.2%降至2.4%，比原來唔見了四分之一，差過市場預期的2.5%，不過博聯儲局暫緩退市的，只係開心得個幾鐘，皆因隨後公布的密歇根州大學二月消費者信心指數唔差，終值81.6，比市場預期好。

電動車普及勢必帶動鋰電池需求，難怪電池股前景被睇好。（資料圖片）

太陽日誌

想從聯儲局主席耶倫身上探口風？一樣無計，上星期耶倫出席參議院銀行業委員會聽證會時，話明美國部分地區的嚴寒天氣會影響開支數據，故難以斷定數據積弱情況會持續幾耐。另一方面，佢唔排除暫緩退市，即每月縮減百億美元的買債規模，但同時又補定飛，話當前買債步伐不變，即係講咗等於無講。退定唔退，似乎最快要到十八、十九日的FOMC至有答案。

股神睇好美國經濟

股神巴菲特上市旗艦巴郡派成績表，盈利達到創新高的195億美元（約1,521億港元），按年升31%，儘管巴郡帳面值五年來累升91%，但卻仍跑輸畀標普五百指數公司同期的128%升幅，不過股神話預期好快會重新跑贏標普五百指數，年度給股東的信中仲特別提到睇好美國經濟，巴郡也準備好進行更多大型收購項目。

準備子彈「濕平」不止股神專美，上星期英國媒體報道，指大炒家索羅斯及「沽神」普爾遜（John Paulson），不約而同投資在西班牙一間房地產公司身上。依家西班牙全國四分之一人口失業，媒體上成日見當地在建物業爛尾及新盤空置變成鬼城一樣的新聞，諗起股神金句：「別人貪婪時要恐懼，別人恐懼時要貪婪！」如果消息屬實，或意味西班牙經濟最差時刻可能過咗。

出口航運股有運行

近排人民幣弱到離譜，上周五低見6.1760，同一月中匯改後高位6.0393比較，已貶值2.2%，賓架界認定係人行教訓班賭升值炒家，來一次大挾倉。堅定流？真係唔知，睇周末公布二月中國官方製造業PMI數據，係就係跌落50.2，但總算高過50的盛衰分界及大行預測的50.1，趨勢係落緊，但情況唔足以令匯價崩圍式急插咁恐怖，人仔走勢更撲朔迷離！姑勿論點，匯價貶值之後，或者市場會認為對出口及航運股有利，短期可睇番好些少。

電動車是否泡沫？單係睇美國電動車鼻祖Tesla股價，一年之間由34美元炒上最高265美元，可見市場係炒完先諗。Tesla啱啱宣布投資50億美元建設全球最大鋰電池生產基地。一部手機、電腦或者數碼想機，先用一片充電池，一架Tesla Model S用八千幾塊，需求是必然。內地愈來愈多城市支持電動車發展，諗落賣車初期只係甜品，充電池及其他配套設備，可能至係主菜。

比亞迪股份（01211）短短一個月內股價高低位差五成，上星期炒風蔓延至電池股，中聚電池（00729）在上周四、五合計升幅四成二，連光宇國際（01043）都一度升逾8%，飛毛腿（01399）曾升4%。正路講，當然得自給自足的比亞迪揀得落手，其他唔係業績麻麻，就係交投太疏。但話說回頭，既然過百倍估值的比亞迪都炒得落手，其他電池股也未嘗不可。