今個星期五將有兩幅住宅地截標，當中大埔白石角臨海地皮可以起到70幾萬方呎樓面，係今個年度數一數二嘅大型住宅地。由於該區發展愈嚟愈成熟，相信會有唔少大發展商競逐，其中喺區內已有發展項目嘅信置（00083）等，入標機會好大。市場估計地皮成交價可以去到約50.11億元，挑戰今年度成交價最貴單一地皮。

大埔白石角科進路大型地皮，料吸引大型發展商及財團入標競投。（資料圖片）

高緯環球張翹楚稱，白石角地皮競爭將會熱烈。（資料圖片）

兩幅將截標住宅地皮資料

劉Sir知道，上述白石角大型住宅地都幾有睇頭，佔地大約20.45萬方呎，提供約71.58萬方呎樓面，喺今年度賣地計劃入面，規模上數一數二，幾啱大型發展商或者財團口味，其中區內擁發展項目嘅信置等，劉Sir認為入標機會都幾大。

問鼎今年度總價地王

老友高緯環球張翹楚話，呢幅白石角地皮有唔錯景觀，但要留意地皮會面對較大競爭，事關區內有落成無耐嘅大型新盤，佢估計地皮每方呎樓面地價大約5,000元，折合估值約35.79億元。

不過，市場依家估值上限去到大約50.11億元，樓面呎價約7,000元，有機會挑戰今年度成交價最貴地皮。

其實呢區都好耐無地皮批出，對上已經係二○○九年底，當時大埔白石角發展區D1及D2地盤就以51.5億及52.5億元，由信置分別以獨資、同埋與嘉華國際（00173）合資投得，樓面呎價大約7,145及7,284元。

西貢地起洋房料搶高

至於同日截標嘅西貢碧沙路與清水灣道交界地皮，就可以發展低密度洋房，可建樓面約8,026方呎。張翹楚話，除咗發展商，相信呢幅地都會吸引用家入標，有機會搶高地價，預計樓面呎價約1.5萬元。估值約1.2億元，係市場上限價。

劉Sir記得，西貢低密度地皮過往有新高價成交紀錄，好似前年以7億元批出嘅西貢清水灣碧沙路地皮，樓面呎價21,349元，到依家仍然係新界區最貴重土地。