魚缸Blogger：富智康挑戰高位

市場期待大Mon新iPhone，尋日一眾蘋果概念股爆上，其中富智康（02038）裂口高開，狂飆13.2%，以近全日高位的4.35元收市，有勢挑戰不對稱雙底頸線4.41元，唔大貪先睇4.8元。

公司於去年底發盈喜，預期截至去年底止全年將會扭虧為盈，原因係產能及經營效率提升令毛利率改善，同埋銷售及行政開支控制得宜，估計下半年綜合溢利淨額亦會好過上半年的1,723萬美元。

瑞銀同德銀齊齊出報告，分別畀佢目標價4.4元同5.8元，前者話該股調整過多、估值吸引，後者就睇好公司垂直整合能力、原設計製造（ODM）訂單增長，預測去年純利6,360萬美元，其中下半年比上半年多1.6倍。