二月眨吓眼去到尾聲，期指結算前夕，個市升又升唔多，跌又跌唔落。見A股拗腰倒升，尋日恒指收報22,437點，升120點，連續第八日在唔夠500點內上落，睇怕都要等結算完先會見真章。一月中，恒指畀條50日線壓住，至直插落21,197點創近半年新低，後市能否轉勢，破唔破到50日線（即22,610點）相當關鍵。

寶馬要提高在中國市場的佔有率，華晨業績前景值得睇好。（資料圖片）

太陽日誌

綜合大行預測華晨業績（人民幣）

騰訊（00700）昨升1.8%，收報586元，差些少又再挑戰歷史高位591元，夠晒搶眼之外，手機及硬件生產商見鑊氣，通達（00698）升6.9%，收報0.92元。特別一提，高盛調高酷派（02369）目標價，由5.2元去到6.1元，刺激股價勁升13.4%至5.07元。

高盛改口撐酷派

高盛睇好理由包括酷派手機推出時間表，同中移（00941）4G服務登場的時間配合，有利爭奪市場份額，其次係睇好公司網上銷售手機的策略。仲記得舊年十一月中，高盛先將當時仲叫中國無線的酷派，剔出確信買入之列，目標價只係3.1元，短短時間睇法一百八十度改變，目標價仲翻一番，真係乜都畀佢講晒。

上星期咁啱坐到架比亞迪（01211）電動的士，老實講，內籠確係及唔上皇冠咁寬敞，不過依家空氣污染日益嚴重，為環保兼且司機身體健康（師傅話每七、八個鐘，就同架車一齊叉叉電！），都係值得推廣。

近排比亞迪股價無受市況反覆影響，昨升9.6%，收報47.85元，番到一○年第四季水平。睇番股價由巴菲特入股後高位88.4元撻到落10.92元，距離0.5跌幅阻力49.66元已經好近。

芬佬鍾情電動車

以股論股，比亞迪一五年市盈率可能仲響50倍樓上，一啲都唔平，但近期內地大力發展電動車配套設施，天津啱啱推《新能源汽車推廣應用實施方案》，建66個充、換電站，在全市建造6,700個充電樁，北京市亦話短期內發布第一批新能源候選車型，同時在市中心區打造半徑平均5公里的充電圈。基金經理追概念，唔通因為Leaf買日產，又或估值不相伯仲的Tesla咩。

近期比亞迪醒神外，大部分車股頭耷耷，講到尾，賓架驚內地政府因霧霾天氣而會有針對車業的政策，不過亦因為咁，唔少車股估值番到去吸引水平。尋日留意到單內地新聞，話說為要收窄同Audi在中國市場的距離，寶馬要催谷其內地合營夥伴，在瀋陽鐵西區的引擎廠，產量要在一六年前翻一番，由每年20萬去到每年40萬。

查實由華晨（01114）及引擎供應商新晨（01148）畀芬佬的極樂觀營運指引，斷估同今次數字相差唔遠，不過換轉寶馬開口說服力大好多。華晨一四年PE11.2倍，貼近五年歷史估值10.9至34.3倍的下限，以兩間公司今、明兩年業績增長預測，真係幾抵買，趁未起鑊可諗諗佢。