近排公布的美國經濟數據麻麻，華爾街又嚟「公我贏字你輸」，數據好，股市好，數據壞，退市緩的遊戲。道指及標普指數差些少創新高，不過在科網及醫藥股強勢帶動，前晚納指已率先創下十四年新高。

維達現價已接近回到去年SCA的收購價，再跌空間有限。(資料圖片)

太陽日誌

綜合大行預測維達業績（港元）

香江股民又一次蜑家雞見水，A股連續四日開得高收day low，一支又一支大陰燭，挑戰緊港股玩家的忍耐力。尋日大市最巴閉時升130點，午後隨住滬綜指山泥傾瀉的影響，倒跌71點收場，收報22,317點，主板成交654億元，比周一的571億元多出近一成四。

滙控（00005）真係衰咗太耐，無期望就無失望，加埋今年股息有5厘提供足夠緩衝，趕客業績後，大行目標價及評級普遍係小修小補，中金及大摩都叫人增持，睇100及90元，瑞銀話中線睇85.5元，已屬口淡淡之流。

不過，銀紙最唔識講大話，尋日滙控一隻股票跌2.6%，等於拖低恒指94點，一加一減，換句話無滙控因素影響，其實個市無跌兼且升，認真陰陽怪氣。

人仔升值期完結

更弱勢的是國企股，成分股一升五跌，跌多升少情況連續第四日，話人民幣近排急跌，同A股連續四日插水無關係，真係搵鬼信。一月內地出口及外資流入數據本來唔曳，但美金兌人仔由一月低位6.0393，去到尋日6.1234，個多月時間內人仔貶值1.37%，對比成個一三年升值3%，近期跌勢之急可想而知。

有大行分析認為，人民幣穩定升值的日子，已隨着人行應對外資流入引發信貸過熱現象做管理而告一段落，短期美元兌人民幣會在6.1算水平穩定落嚟。看來自○九年開始習慣國企股年年業績增長有額外匯率好處的投資者，要適應一下新遊戲規則。

收購價具承接力

市況不穩，繼續向心目中safety margin夠高的股票埋手。維達（03331）現價12元，較去年納指上市護理產品巨擘SCA收購作價每股11元，高出唔夠一成，維達一四年市盈率19.1倍，比恒安國際（01044）的23倍平一成七。

較多港人認知的SCA產品，相信是Tempo紙手巾，查實佢手上護理產品品牌仲有TENA、Tork、Libero及Dr.P等，覆蓋中高檔次嬰兒及成人紙尿片品，第四季SCA重整內地業務，包括清理舊庫存，今年開始通過維達現有全國銷售渠道推出新產品，加上國家長遠修訂一孩政策，可見的一兩季內，維達業績預計獲重估的機會唔細。

收購完成後，維達最高見過14.2元，從一月的跌市中可見，11元收購價明顯有支持。內地紙巾生意飽和，今年上半年紙巾毛利率難會有大改善，是捧場客不願見之事實，但SCA為top line（銷售額）帶來的好處，暫時看來是被投資者所忽視，如果受市況偏軟拖累落番12元樓下，中長線投資諗得過。