上周五標普五百指數即市高位見1,846點，可惜其後達拉斯及聖路易斯聯儲銀行阿頭，雙雙發出聯儲局會繼續退市步伐的預告，三大指數最後倒跌收場，雖然跌幅唔大，不過技術上一日唔突破雙頂，總令人有些少不安，尤其一月美國失業率跌到6.6%，同上任聯儲主席伯南克所訂的6.5%退市目標只差毫釐。

在國策支持下，內地風電行業已經由「逆風」轉為「順風」。(資料圖片)

太陽日誌 2014/2/24

綜合大行預測滙控業績（美元）

可以預期，下月十八、十九日議息日（期間仲有一次二月就業數據），聯儲局勢必就退市指引作出修訂，期間鷹鴿兩派亦必會就加速退市抑或重訂退市與失業率掛鈎目標而交鋒，股市最唔鍾意估估吓，如此氣氛底下加埋個雙頂，真係唔多盞。

國指走勢欠佳

一葉知秋，先前港匯早於港股見底反彈，在下估新興市場撤資潮可能告一段落，結果個市由21,197點彈番去上周四高位22,742點，但相比尚有濠賭股及騰訊（00700）托住的恒指，國指只由低位反彈5.4%，動力不及恒指的6.4%。上星期五恒指反彈174點收市，國指居然逆市跌41點，走勢認真麻麻。

今日焦點一定係收市後大笨象滙控（00005）份成績表，綜合大行平均預測賺171.65億美元，但重點應該係滙控派息會唔會闊佬番啲，大行都估緊末期息會由18美仙增至20至24美仙。

曾經係港人至愛的滙控，○九年海嘯低位反彈後，近幾年令唔少人失望，一三年更係困守在十幾蚊內上落，只有間中在長短倉基金做套戥活動或者有衍生工具發行時，先至有番啲睇頭。

但計埋股息，舊年滙控先至勉強有3%回報，相對同期美國銀行股iShare，或歐洲銀行股iShare EURO STOXX，回報分別25.1%及30.9%，一眾大笨象捧場客難免咬牙切齒，對佢又愛又恨。

滙控定位尷尬

坊間對滙控一四年股息預測有5.1厘，睇落OK，但如果結合美國退市，近大半年公司債券孳息普遍見底回升，加埋未來兩三年，滙控top line（收入）增長展望一般，又有啲雞肋味道。若認定新興市場否極泰來，首選應該係渣打集團（02888），如果認為歐洲、美洲銀行生意有運行，芬佬又未必揀香港佔收入最大部分的滙控。定位上的尷尬，多少係滙控股價膠着的主要原因。

距離內地兩會下月會期愈來愈近，上周環保及新能源股表現較硬淨，不排除未來兩周會提前炒一轉。光伏股中，保利協鑫（03800）上周五股價起動，升半成收報2.8元，14日RSI動力增強，若本周初升勢持續，有勢反覆挑戰五十二周高位3.02元。

風電股方面，過去一年，內地風電行業已由「逆風」轉為「順風」，今年「順風」的動力好大機會在國策推動下進一步增強。中國風電（00182）上月初發盈喜，預期去年度純利將按年大幅增加，主要受惠發電量及EPC收入增加。

上周五，中國風電股價以全日高位0.72元收市，升幅半成，短線若確認升穿由上月高位0.84元所延伸的降軌阻力，料可再向高位進發，支持位在0.65元。