真係唔到你唔信邪，尋日港股早段係威係勢，將一月下旬跌市中，於22,659至22,722點的最後一個下跌裂口都補埋，但之後滙豐PMI數據一出，恒指即時高台跳水，埋單插低270點，收報22,394點，高低位來回達445點之多。

雖然內地拆息已自高位回落，但內房股水緊情況似乎未有改善。(資料圖片)

太陽日誌

講番滙豐製造業PMI，由一月的49.5滑落至二月的48.3，創七個月低位，兼低過50盛衰分界，反映製造業處於緊縮當中，自然唔係太好兆頭。

但留意到數據取樣時間介乎本月十二至十八日（年十三至十九），即係啱啱過咗一月三十一至二月六日的內地農曆新年假期，但就未過農曆十五，相信唔少中小民企員工，仲未回到工作崗位，因此史提芬認為要睇埋最終修訂值，先至見真章。

科網泡沫景象重現

網絡巨擘四圍shopping唔係騰訊（00700）及阿里巴巴專利，昨日金融圈焦點係近日被指年青用戶流失的facebook，斥資190億美元買入擁有4.5億活躍用戶的WhatsApp，相當於以1,482億港元買下一間僅聘用32個軟件工程師的「小公司」，數人頭每個值46.3億港元（舊年Instagram收購段頭計值7.8億港元），facebook又創紀錄。

尋日網上流傳一單舊聞，WhatsApp創辦人Brian Acton於○九年放棄雅虎工作之後，曾向facebook叩門搵工，但朱克伯格當時唔「蘇」佢，結果自立門戶，先有今日萬倍奉還的故事。

尋日收購消息傳出後，有人即刻同騰訊計數，以190億美金換4.5億用戶計算，即係除開每個活躍用戶值42美元，套落騰訊旗下擁有超過6億用戶的微訊身上，即係值252億美金或1,965億港元！唔知點解，史提芬總係覺得有啲二千年科網泡沫爆煲前，以眼球、登入人數計價的味道，諗落都有啲驚。

公司發債前仆後繼

前晚聯儲局公布一月份議息會議紀錄，有委員就提出上月失業率已落到6.6%，即將觸及上任伯南克所定的6.5%加息指引，故建議作出調整。

美國有幾大加息空間？筆者頗有保留，近期美債息兩度見3厘樓上，都已經頂住。不過，近排的確見到唔少公司為升息周期做準備，大有山雨卻來之勢，尤其係高資本需求的房地產商。

今個星期，新世界（00017）以及新地（00016）已先後發債（七年期5.5厘及十年期3.75厘），尋日輪到潤地（01109）加入伸手黨行列，一口氣推五及十年期債，預計票息4.48及6.1厘。再數遠啲，一月至今，富力地產（02777）、合景泰富（01813）、奧園（03883）、世茂房地產（00813）、花樣年（01777）、禹洲（01628）、綠城中國（03900）以及華南城（01668），都已經先後伸手，幾近三日一債局面。

公司債突然之間熱鬧起來，但同舊年五月之前形勢唔同，果陣時私人銀行直頭建議客仔動用孖展認購，賭一開即升，相反近期鑑於供應充裕，又唔係太多新錢留戀債市，新債開波多數無乜肉食。

話說回頭，一堆內房發展商一三年銷售熱爆，但都仲係要不斷搶錢，多少反映內地拆息即使由高位回番唔少，但水緊情況，尤其對於民企而言是景況依舊。