近年本港核心區街舖搶租情況大減，搞到租金升幅有放緩迹象。有國際研究報告指出，上季度香港核心零售區街舖呎租維持約2,800元，雖然係連續六個季度蟬聯全球最貴舖租嘅城市，但期間嘅呎租水平相同，即係六季舖租「零升幅」。反而，舖租第二貴嘅美國紐約，按季再升近半成，呎租升穿2,100元水平，兩地差距進一步收窄至約兩成。

銅鑼灣羅素街繼續成為全球最貴舖租地段。（資料圖片）

全球最貴舖租城市排名

世邦魏理仕發表最新研究報告，追蹤全球97個主要零售市場。劉Sir就發現舊年第四季全球零售舖租排名，香港繼續以每月每方呎約2,800元的租金，位列榜首。

倫敦升6.3%最凌厲

其他主要城市好似紐約、法國巴黎同英國倫敦嘅舖租亦屢創新高；頭十位中以第四位嘅倫敦，按季升幅最明顯，升幅達6.3%至呎租881元。

而第二位嘅紐約，亦升達4.7%至2,145元水平，連續3個季度上升，累升逾一成。

二線舖空置率增

劉Sir認為，相比香港橫行嘅租金走勢，反映美國及歐洲經濟復甦下，區內城市嘅競爭力增強。期內，巴黎以每方呎約944元，排名第三位。至於第六位嘅澳洲悉尼、同第七位嘅日本東京，卻雙雙出現跌幅，舖位租金分別按季下跌4.2%同3%，不排除與匯率變化有關。

該行香港商舖服務部資深董事連志豪話，香港銅鑼灣羅素街供應緊絀，繼續係全球最貴舖租地段。

雖然內地旅客消費力下跌，但係仍然有不少國際中檔服飾品牌進駐。整體而言，香港租金將從高位稍為放緩，而二線街道商舖空置率上升，預計租金前景出現平穩或下跌。

匯八坊16舖沽出

另一方面，中原黃瑋琮同劉Sir講，投資者廖偉麟舊年年底以逾3.5億元買入嘅彩虹站上蓋匯八坊商場，其中有16個舖已經率先透過內部認購沽出，佔項目逾半數樓面。

據講，個別商舖呎價6.3萬元，項目套現約兩億元，剩番未賣其中9個舖加價8%，同埋以確認人方式發售。