過去兩日個市有點拉牛上樹，不過尋日恒指埋單都總算仲有76點進帳，收報22,664點，即市高位22,708點，差些少就可以完全回補今浪最後一個裂口（22,659至22,722點）。

國壽如今的市盈率，只是A股爆破前高峰時期的約三分之一。(資料圖片)

太陽日誌

綜合大行預測國壽業績（人民幣）

滙控（00005）都算誇張，一個月唔夠由86元被芬佬插到落78.5元，再來一招釜底抽薪，尋日番到去84.85元，升1.8%，貢獻恒指62點，相當於全日指數升幅八成一。

今舖芬佬由撤資變到買返轉頭，確實令一眾魚缸友目不暇及。之前驚非洲及中東市場收入見頂，渣打（02888）亦由165元畀基金洗到落155元邊，近日輾轉升凸，尋日去番170.9元，證明睇錯市低沽高買，並唔屬於普羅散字派的專利。

東風有機試低位

因為怕中央有針對改善霧霾天氣的政策，引發消費者提前買車，故一月內地汽車銷售唔錯，但一眾車股股價卻未見受惠。

東風（00489）落實認購法國標致汽車（Peugeot SA）股權，每股認購價7.5歐元，涉及5.24億歐元，另外亦會斥資2.76億歐元作供股之用，總代價8億歐元，東風及齊齊注資的法國政府，各佔擴大後股本14%。市場對消息反應正面，尋日歐洲市早段，標致汽車股價彈升近9%，去到13.6歐元。

去年內地車市大旺，東風年中時坐擁近250億人民幣現金儲備，交易帶來的資金壓力應該唔大，不過可見兩三年內，標致汽車受歐洲車市疲弱影響，形勢逆轉的機會不高，尋日東風跌至10.84元，睇走勢有機會試番二月初低位10.42元。

幾隻內險股一月份的保費數字陸續曝光，大致是喜出望外，最勁的新華保險（01336）原保險保費收入達273.8億元（人民幣．下同），按年大升1.3倍；國壽（02628）則升72.8%；平保（02318）亦升41.5%；而太保（02601）升31.7%；財險（02328）亦有22.4%進帳。

國壽市盈率縮水

假如睇番內險股的歷年估值走勢，的確相當驚嚇，國壽市盈率在A股爆破之前，曾經是40倍樓上，如今以綜合大行預測其一四年盈利352億元計，預期市盈率14.2倍，大約只是高峰期的三分之一。

當然，○七年前A股大旺，但今時唔同往日，滬綜指由6,124點到尋日得2,142點，唔見四千幾點，IPO分餅仔的着數不復再，真係要落手落腳去做生意，硬係要回望以前天咁高嘅PE，是不合時宜，而對比殘過地底泥的內銀股，內險股其實唔算好平。

如果極度睇好A股，借內險股作為跳板無可厚非。但近日A反彈，一則歸功於較預期理想一月新增貸款數字，筆者相信這主要係銀行去年埋數後重新放貸扭曲所致，二、三月先至會見真章。其次二月的IPO空窗期，促使早前炒新股的資金回流二級市場。

兩個因素睇落都會相當短癮，內險愈彈得近舊年十二月高位，在下認為應該分段減磅先至係上算。