過去幾年寫字樓租金回報偏低，加埋「辣招」打窒唔少買家入市意欲，買賣成交每況愈下。睇番代理嘅資料，上個月中上環區、同埋灣仔區都未錄得任何甲級寫字樓買賣，連同金鐘、尖沙咀及觀塘與九龍灣等商業核心區，期間加埋都只係8宗買賣成交，比起舊年同期大跌超過88%。

港島甲級寫字樓買賣偏軟，加上業主不願大幅劈價，令買賣成交每況愈下，上月中上環區和灣仔區都未錄得任何成交。（資料圖片）

黃漢成認為，今年上半年甲級寫字樓買賣悶局難以打破。（資料圖片）

各區寫字樓買賣統計

劉Sir收到美聯工商舖啲資料，喺咁多主要商業核心區中，中上環、灣仔、金鐘、尖沙咀、觀塘同埋九龍灣，舊年全年合共有361宗甲級寫字樓買賣成交，當中一月佔69宗同類成交。不過，上個月同類成交只得8宗，少咗88%。

睇番舊年中上環區甲級寫字樓買賣成交只係得4宗，中環皇后大道中九號全年錄兩宗買賣，已算係全區成績最好商廈，而上個月區內更加未錄得任何買賣成交。

灣仔四個月全吞蛋

灣仔區情況都唔好得幾多，舊年全年只有4宗甲級寫字樓買賣，全年有四個月「食蛋」，上月該區都未錄得買賣成交。而金鐘區甲級寫字樓買賣舊年全年逆市大豐收，錄得約45宗，睇真啲，當中約29宗都係舊年一月及二月錄得，其餘各月每月成交只有1至3宗，今年一月該區都只得3宗買賣。

東九去年195宗標青

至於九龍東方面，甲級寫字樓買賣成交表現比港島區好得多。其中，近幾年成功轉型做新興商貿區嘅觀塘同埋九龍灣，舊年全年錄得195宗買賣，最多成交的月份多達49宗，至於今年一月份，該兩區錄得4宗成交。

美聯工商舖行政總裁黃漢成認為，近年甲級寫字樓買賣減少，主因包括租金走跑輸大市，加上政府「辣招」令投資者甚至用家都卻步，而業主普遍不願大幅割價出貨，令市場買賣成交明顯膠着。

「舖王」鄧成波約兩年前買入嘅尖沙咀部分地庫商舖，同埋部分地舖，聽講最近有投資者出價傾緊悉數購入，涉額約9億多元，呎價約3.1萬元。

相對於佢購入價6.45億元，期內物業帳面升值約2.55億元。