要數馬年轉運的外幣，其中一隻一定係澳元。澳元反彈持續，上周四澳洲公布失業率升至6%，雖曾令澳元自0.9080回落至0.8920，不過反而被視為低吸機會。

澳元兌美元走勢

依家的澳元，有少少似內銀股咁超賣反彈，大家都唔知道個反彈幾時完，但又唔敢咁快睇淡。市場仍炒作澳洲央行兩周前會議聲明一改口風，而勞工市場疲弱亦屬意料中事，最近日本豐田宣布撤出澳洲，失業人數進一步上升，而就業市場差，自然影響當地消費，因此澳元雖反彈，但難言轉勢。

近日澳元反彈亦有賴美國數據轉差，市場將會轉炒美國聯儲局有機會減慢收水步伐，不過呢啲都只屬炒作藉口，聯儲局大方向仍將退市，故對近日澳元反彈不能過分樂觀。

技術上，短線一浪高於一浪形態持續，暫時未見於0.9070出現太大沽壓，而上周公布失業率後澳元急跌然後回升，亦可視為買盤強勁，預期澳元仲有少少位可以升穿0.9080，挑戰下一阻力0.9170，不過0.9270阻力強，要再上一層樓就有啲難度，可以見到每升100點都已經有個阻力位，現價先追入就相當尷尬。

支持位則已由0.8830向上移至0.8920，預期本周區間在0.8920至0.9170。