內地股市之前驚IPO重啟驚得要死，滬綜指由2,260點隊到落1,984點先至見底，到春節前掉轉頭炒，主要係市場一個故事兩種解讀方法，憧憬二月IPO真空期，僅幾隻新股上市資金回流，滬綜指又輾轉彈返去尋日的2,135點，收復跌浪五成有多。

為紓緩公營服務壓力，內地政府近年鼓勵私營醫療系統發展。（資料圖片）

太陽日誌 2014/2/18

券商預測鳳凰醫療業績（人民幣）

港股選擇跟住無章法可言的A股行事，昨日再升237點，收報22,535點，終於返到去舊年九月至今年一月，22,500至24,000點的大型上落區，但當日橫行區底部的支持就變成今日的阻力。

睇番上周五及本周一的升市，成交明顯縮減，主板成交分別556億及603億，遠比上周一至四的日均成交664億少，市況反彈至此，沽空佔大市成交比率於過去兩個交易日回到8.9%及7.1%，可見無論係基金定淡友，都開始轉向審慎。

科網股恐炒過龍

近期資金選擇側重少數股份板塊，部分二三線有炒過龍之嫌，超過萬億市值的騰訊控股（00700），都可一日升5.7%，尋日收580元創歷史新高，貢獻恒指109點。

騰訊的強勢緣自美資行Jefferies畀佢660元目標價，點解係660元？無謂深究，按此計算一四年市盈率59倍，就算複合每股盈利增長可以維持每年28至30%，都唔可以話平。

在下唔打算阻人發達，尤其今日網絡股，講概念唔講業績，近日所見，無論券商或者傳媒，兩大內地網絡土豪染指任何生意，都清一色被睇好，享有神級估值，所以都無謂拗頸，即管睇吓去到阿里巴巴上市時，泡沫可以吹到幾大。

中國首都北京霧霾情況嚴重係人都知，在放水全面刺激經濟無望之下，市場估中南海的首要任務，是改善染污情況，煤炭、火電及高污染的鋼鐵股唔使睇住，焦點落在新能源、環保及醫療醫藥股身上。

現價估值唔算平

醫療設備、醫藥及醫療服務之中，尋日鳳凰醫療（01515）啱啱破位，升5.2%，收報13.64元，未破13.82元的上市新高，但收市計已係上市新高。目前港股市場上，從事內地私營醫療服務的股份，並無其他選擇，難怪去年十一月以7.38元上市之後從未見較大調整，慢火煎魚咁上，多少見基金收貨收得好乾。

鳳凰醫療三大核心業務，一是經營私營醫療，其次是以IOT（投資、營運、轉移）形式為第三方管理醫院及診所，最後是為旗下醫院及診所提供藥物、醫療設備及醫用耗材的供應鏈服務。舊年上市集資，主要用來將北京公立醫院私有化、以及把IOT經營模式擴展至河北、山東、山西、河南及湖北等地。

鳳凰是全國最大私營醫療企業，政府也鼓勵私營醫療系統發展，以減低對公營服務的壓力，其故事講真無懈可擊，唯一考慮係估值唔平，就算券商預測一四至一六年的盈利增長70、27.5及27.8%，對比一四年預測PE 47.4倍，都唔可以叫做抵，惟獨概念獨特，市場無其他選擇兼且走勢突破，短期有投機追入的價值。