Fundman睇市：歐舒丹 發力可跟

有趣是債市及股市似乎有兩種截然不同的解讀方式，十年美債孳息升0.04厘，收報2.72厘，見兩星期高位，反映債商認為耶倫好大機會沿用其前任伯南克逐步退出量寬的貨幣政策。

華爾街三大指數一樣勁升，道指抽升192點，返到去三星期高位15,994點收市，股市投資者認為耶倫暗示未有耐退市，兼且超低息期可能拖得比預期更長。

到底邊個睇啱，邊個睇錯？睇嚟都無乜所謂，尋日亞洲新興市場股市氣氛回暖，市場當正耶倫係財神一樣看待。

內房股終見起動

昨日推介的內房股，終見更多機構投資者垂青，心水嘅世房（00813）同中海（00688）分別升5.9%及7.4%，如果想在二線梯隊中尋寶，花樣年（01777）、融創中國（01918）以及保利置業（00119）都值得考慮。

蒙牛（02319）向法國乳業巨頭達能配售1.2124億股，集資51.53億元，以抵消去年收購雅士利（01230）所產生的未償還債務，達能則藉此增持蒙牛，由4%升至9.9%，成為第二大股東。

由於配售價42.5元較前日收市價有一成五溢價，尋日蒙牛最高掃到上40.35元，收37.95元，升2.9%。就算尋日高位追咗貨都唔使愁，因收市後恒指服務公司季檢，剔除中煤能源（01898）而將蒙牛納入，睇怕指數基金今日點都掃番隻蒙牛上去。

蒙牛三傑有排炒

去年中先後收購現代牧業（01117）以及雅士利後，中期報告所見，蒙牛短債由5.7億元升至39.57億元，計及手頭現金升兩成八去到74億元，再加埋十一月發5億美元五年期債券，斷估資金壓力已解決。

但當然，印公仔紙零成本取得資金就更加盞，往後會唔會有大動作跟尾，值得留意。早排向雅士利買入非核心資產後，已經有分析員估下一步係兩者重整嬰兒奶粉業務及供應鏈網絡，呢一門三傑睇怕仲有排玩。

落後基金股中，筆者留意緊隻歐舒丹（00973），佢三大主要市場依次係日、美同香港，芬佬早排怕今年日本提高消費稅累事，股價由22.9元高位碌到落早兩星期最低的14.98元，累積跌近三成五。

近排日本央行話可達到2%通脹目標，市場亦開始淡化消費稅的負面影響，依家基金主題係搵番啲成熟經濟國家收入股票，歐舒丹啱啱在15至17元之間打好個圓底，尋日見大成交發力，以其一五年（三月結）PE18.6倍計，低於歷史平均的22.8倍，同一○及一二年兩次高位32及28倍，更加有頗大距離，趁勢頭唔錯，短期可博佢上番20至21元。