農曆新年剛過，灣仔、銅鑼灣同旺角等一線街唔少短約舖租約好快完，有啲業主已經成功搵咗長約租客。不過，喺依家消費市況唔明朗下，新租金加幅好細，有啲升幅得單位數字，其中灣仔道93至99號地下有個短約地舖，啱啱以每月唔夠14萬元預租長約，比起之前長約租金多1萬元都無，加幅只約6.2%，反映業主求客心切。

銅鑼灣景隆街地舖呎租雖冠全港街舖，但有地舖業主求客心切，長約叫租未敢大幅調高。（資料圖片）

核心區短租舖預租長約個案

一線街短約舖業主叫價高，市場實際錄得的短租成交唔多，以上述三個區計，成功短約租出舖位唔多過10個，反映租戶承租意欲極為審慎，業主又唔想舖位長時間「丟空」，嗌長約時，要求租金都唔敢咁高。

灣仔區加21%算多

劉Sir收到風，上述灣仔道地舖依家短租緊，面積約700方呎，估計目前月租金近10萬元，而之前長約月租金就約莫13萬元，依家長約預租租金叫約13.8萬元，呎租約197元，比起之前長約租金多唔夠1萬元，增幅僅約6.2%。

灣仔區好多個短約舖位租期快到，所以呢類舖位業主物色長約租客時，租金加幅都只係近10至21%左右。

其中，區內菲林明道7號地下部分，依家由賣賀年物品商戶短租緊，面積約200方呎，估計目前月租金約4萬元，業主早排提出長約意向月租約6.8萬元，計起上嚟呎租約340元，比起個舖之前長約租金約6.2萬元，只係加約9.7%。

景隆街呎租叫2250

雖然銅鑼灣景隆街有地舖呎租冠全港街舖，但條街有個雙號舖，短約租期就到，面積約200方呎，業主依家嗌長約月租金約45萬元，呎租約2,250元，較之前長約租金只加約28.6%。

而近幾年吉舖數目明顯多咗好多嘅旺角登打士街，部分放租已一段時間嘅吉舖業主叫租水平都回落咗，其中45號地下一個短約緊嘅舖位，面積約200方呎，目前月租金料約8萬元，業主現提出長約月租約16.8萬元，呎租約840元，比之前長約租金只高約12%。

美聯工商舖（00459）行政總裁黃漢成話，依家街舖業主普遍取態係「求客先求租」，所以租金加幅好難倍升。