尋日人行無出手做逆回購，隔夜到三個月期的上海銀行同業拆息，卻見全線回落，係水緊局面有結構性改善，抑或春節後資金需求未恢復？真係睇唔通。不過內地股市踏入馬年像萬馬奔騰一樣，卻是不爭事實，滬綜指尋日重返二千一點關口樓上，A股年假期間外圍陰雲密布，相信當時真係無人估到會有咁結果。

多家內地龍頭發展商，春節後都發表極為樂觀的一四年銷售目標。（資料圖片）

太陽日誌

綜合大行預測世房業績（人民幣）

近日又確係見大行出嚟唱反調，話中國股票抵買，直到前日為止MSCI中國指數今年跌8.1%，跌幅大過MSCI新興市場及環球指數同期的6.5%及3%。早前，中資派被索羅斯、債王格羅斯等大孖沙輪流出口術唱衰下，確實有超賣現象。

較實在的比較數字，過去幾次金融危機，好似一一年溫州出事，國企平均PE 6.6倍，一二年歐債危機見8.1倍，一三年伯蛇預告退市時為6.6倍，相比依家國企股平均得6.4倍，已較對上幾次低位便宜。

港股暫脫危險期

中國經濟由求量轉為求質，部分行業盈利可能受損，好似因為利率逐步市場化及競爭加劇的金融業，短期內中資股有死貓彈條件，但當然，基金經理的選擇，會一如去年一樣，相當側重部分仍有增長條件的板塊。

周一港股應升唔升，尋日借住挾淡倉，乜仇都報晒，大市兩個多星期以來，首次企得穩10日線樓上，升383點報21,962點，雖然主板成交666億元唔算多，但技術走勢，暫時係脫離危險期，868隻股票做好，升跌比例1.67對1，創五十二周高位股票35隻，可見二三線股有番多少鑊氣。

打壓樓市機會微

尋日內房股見追落後，世房（00813）、中海外（00688）、保利置業（00119）、碧桂園（02007）及綠城（03900），升幅介乎3.9%至4.8%，好不熱鬧。去年底，史提芬已估計在經濟增長的不確定性下，中央強勢壓抑樓市的可能性唔高，最多只會在現有政策中微調。

睇番已公布一月銷售數據的內房股，絕大部分都相當勁，好似恒大（03333）的合同銷售110億元（人民幣．下同），按年升52.3%，碧桂園更錄得176.7億元破紀錄單月銷售，按年大升1.4倍。面對咁強勁銷售增長，仍有部分看淡者認為，全因去年首十一個月，不少發展商提早完成全年目標，把部分銷售延至今年入帳，好似恒大去年十二月合同銷售得21億元，就創近兩年新低。

最近幾間內地龍頭發展商，春節後發表極為樂觀的一四年銷售目標，同早前股價弱勢，形成強烈對比。恒大搶閘發表一四年年度銷售目標1,100億元，比去年多一成；香港無上市的綠地，在公開場合預告今年銷售目標2,400億元，如無意外，將會聯袂深圳萬科，今年齊齊躋身2,000億元俱樂部。近日內地傳媒報道，碧桂園內部銷售目標亦訂到1,700億元的歷史新高。

姑勿論點，由一批內房大玩家對一四年銷情的樂觀預告，至少可以令憂慮一三年強勁銷售無以為繼的投資者放下心頭大石，而一眾內房選擇中，筆者最睇好世房及中海。