樓市冰封，不論住宅或工商地產代理，收入都大縮水，唔少代理為生計惟有放棄「老本行」或脫離大行。曾經喺中原、利嘉閣等大行工作十七年，年薪曾逾百萬元嘅周偉興，眼見每月只靠數千元底薪過活都唔係辦法，所以決定與Top Sales手足合組洗碗公司殺出另一出路。另去年辭去美聯工商助理區域營業董事嘅黎紹賢，月前亦合資約50萬元於火炭成立代理行。

年薪曾逾百萬的周偉興與一班手足合組洗碗公司。

黎紹賢（左）表示，計劃今年底前新增兩間分行及增聘十五人。

辣招後代理創業個案

喺地產代理界打拚十七年嘅周偉興（老周），活躍於新界洋房市場，曾經係大型代理行嘅區域聯席董事。佢同劉Sir講，以前只要有經驗，幾時都可以入行做地產代理，事關市旺有人追、市淡亦有人趁低吸納，總會有人入市，地產代理自然有收入。

唔使半年收支平衡

但自從政府一○年起連番出辣招後，老周話，辣招扭曲樓市，施政本身解決唔到問題，樓價未見下跌，反而加重買家入市成本，令到成交萎縮。

佢話，去年生意額大跌逾60%，每月收入僅維持數千元的底薪，所以舊年年底終決定離開地產代理行業，原本諗住開火鍋店，但因舖租、人工高，最終放棄。

火炭搞代理 速回本

佢又話，經過一輪資料搜集，去年十月同兩名代理下屬，投資逾200萬元喺屯門工廈開創「洗大餅」洗碗公司，憑着過往管理經驗同溝通技巧，配合大型機器，依家已聘請咗近20名員工，同有獨立車隊，手頭已經有幾個食品加工客戶，達致收支平衡。

去年嘅加強版辣招，連工商物業都受影響，代理生計慘過沙士。曾經喺美聯工商工作約六年嘅黎紹賢，月前就同另外兩名代理合資約50萬元，喺火炭成立喜利佳物業代理，以月租約1.5萬元承租一個面積約300方呎舖位，早前做咗單葵涌區租務成交，佣金約10多萬元，已經夠畀新舖開業嘅裝修等成本。

佢仲話，去年成交大減，唔少代理只係靠底薪過活，但危中有機，以一間小型代理行計，每月只要做到一宗細額工廈買賣同數宗租務成交，已有微利。預期最快今年三月公司可達收支平衡，並計劃年底前新增兩間分行及增聘15人。

另外，美聯港島區前董事楊永健亦計劃自立門戶，主攻港島中半山、山頂南區及跑馬地等大價豪宅市場，冀二手成交佔比例七成，但佢明言唔會向舊公司挖角。