去年十月上市以來，巨星國際（02393）股價一直慢火煎魚，走勢非常靚仔，上周五再創上市新高，升逾半成，以全日高位2.65元收市，同招股價1.38元差距92%，既然已經突破暴炒妹喺去年底推介的目標2.1元，承接強勢，下站阻力上移到3蚊。

巨星係一間內地彩色相紙供應商，產品包括即用彩色相紙、影像打印膠片及醫學影像膠片。截至去年五月底止五個月，快速沖印店彩色相紙 、專業彩色相紙、醫學影像產品收入佔比為19.5%、24.4%、42.1%，前年同期為38%、29%、26.7%，睇到公司逐漸偏重專業彩色相紙業務，同時擴大醫學影像分部，未來將會收購一間醫療設備公司，可同現有業務產生協同效應。

巨星國際（02393）

阻力位：3.00元

支持位：2.45元