舊年雙倍印花稅「辣招」打殘工商舖市場，踏入一四年，好多間代理行都話要自救。好似美聯旺舖會加重資源喺網上市場推廣，吸納更多海外客源；萊斯物業都話會將網上宣傳投資額倍增至約200萬元。中原（工商舖）商業部就計劃新設「租務部」，希望喺超甲級寫字樓租賃市場攞到一個席位。

去年「辣招」推出後，工商舖買賣成交大減，促使代理行出招吸納客源。（資料圖片）

萊斯物業執行董事黎智生指，現時代理行生意表現，不再是以營業員多少來決定。（資料圖片）

工商舖代理行今年部署

舊年二月「辣招」推出後，工商舖買賣成交大減。劉Sir睇番代理行資料，舊年首季，每月平均買賣註冊量超過1,800宗。不過，四至十二月間，每月註冊量跌至約360至740餘宗。

美聯：今年租賃勢旺

美聯旺舖董事盧展豪話，現時該部門營業員人數約有200人，但係商舖買賣嚴重萎縮，依家「人多未必好辦事」，所以今年唔會積極招聘人手，反而會加重網上市場推廣，包括喺網頁加入最新資訊，同埋增加同唔同地域嘅客戶進行互動，打破以前只局限喺香港市場嘅做法。

佢認為，今年商舖租賃市場會比買賣旺，會叫同事睇緊啲商場同商舖租賃推廣。估計今年該部門生意嚟自租賃嘅比重，會由舊年嘅約兩成，增加至約四成。

萊斯大搞網上宣傳

一向專注工廈物業租售嘅萊斯物業，其執行董事黎智生都有同感，佢認為依家工廈市場已經唔再係打「人海戰術」。公司目前營業員約有百幾人，暫時都夠。

該行反而會喺今年會大搞網上宣傳，包括喺網頁上提供多啲盤源最新資料及圖片，仲諗住新設手機及平板電腦應用程式，提升市場曝光率。預計今年整體宣傳費約200萬元，比舊年多1倍。

中原（工商舖）營運總監潘志明亦話，佢哋部門依家有營業員200人，舊年下半年寫字樓每月平均買賣宗數得嗰百宗水平，唔少同事都積極搞租。

佢話，部門希望今年提升租賃市場佔有率，提升方案包括首度開設「租務部」，由專責同事與超甲級寫字樓大業主傾租，以開拓呢類市場。