在多間大行護航下，濠賭股昨日反彈，也支持連跌三日的港股回升。不過，相對過去三日累積逾870點跌幅，昨恒指升得153點，加埋今日A股復市有可能補跌，以及今晚美國公布的一月就業數據，都可能觸動資金撤出新興市場的神經，故昨日的反彈幅度令人失望，其實多少可以理解。

恒指期貨走勢2014/2/9

值得留意，港元弱勢在過去三日明顯有改善，由7.7670附近，執筆時已回升至7.7598，超過農曆年假前跌浪的0.5反彈阻力，或多或少反映資金外流的最壞時間，可能已經過去。

二月期指收21,332點，成交4.7萬張，假如今日A股情況不至太壞，例如2,000點大關守得住，期指有機會先反彈見一見21,545至21,595點之間。

至於今晚的一月份美國就業數據，儘管ADP私人企業就業數據麻麻，但市場似乎信心爆棚，最新預測新增非農職位18.3萬個，比十二月的7.4萬大幅反彈，但筆者無意賭大細，今日就算A股唔太差入市博反彈，都唔會過夜，等下星期一再諗過。