市場觀望美國經濟數據，尋日港股雖然未有再食「彈散」，但成交縮減至590億元。濠賭股呈報復式反彈，金沙（01928）及銀娛（00027）分別升10%及7%，自問唔係藝高人膽大，就少做少錯，唔做唔錯！今日A股復市，紅盤係追回假期期間外圍跌幅，抑或可以成功對抗「地心吸力」，要擔定櫈仔等睇戲！

北控業務遍及啤酒，燃氣及污水處理，論業務性質屬半隻公用股。（資料圖片）

阿里巴巴高層否認公司借殼或注資中信21世紀（00241），言論引發斬倉盤出現。該股開市前時段成交價仲有3.35元，之後質到落全日低位僅2.44元，收報2.61元，跌幅24%，成交3.86億元，連復牌當日的低位都失守，真係幾驚嚇！

中信21世紀唔易炒

阿莊呢期同內地廠家朋友拜年，都聽到唔少廠佬買咗呢隻股份，心想咁多散戶參與，未必係好現象。事實上，隻股要等易手交易完成先至會有大動作，加上短線大環境不利炒上，唔做上就惟有殺落，洗牌再玩過。不過，阿莊深信，阿里唔會白花錢，往後必有搞作，但土豪大鱷的炒法可能仲狂野過啲外資大鱷，總之跟炒轉身要夠快，量力而為。

尋日阿莊指騰訊（00700）有可能係空軍下一個襲擊對象，其股價昨日逆市跌0.3%，收報508.5元，兼已連續七個交易日沽空股數超過100萬股，若然冇貨在手，最好暫時當睇佢唔到，免得遭受池魚之殃，等震盪過後先至好再諗上車！

魚缸風大雨大，策略由攻轉守係好自然，即使係睇，都睇番啲超低殘或防守性股份。好似尋日煤炭股就有好表現，個別新能源及智能手機相關股份亦有追捧。至於綜合性企業，投資於啤酒，燃氣及污水處理等業務的北京控股（00392），尋日股價升4.3%，收報67.1元，成功重上10日線。

去年底且北控股價見過新高78.15元後反覆回落，上月下旬見低位62.25元，公司出手回購成功穩股價，現價剛反彈至降軌阻力，技術上必須要站穩50日線70.5元樓上，始能確認調整完成。

近日有大行唱好北控，着眼點都係其燃氣業務，以北控現價一四年預測市盈率15倍，相對同業估值確實不算昂貴，加上公司回購有利支持股價表現，美中不足係息率有待提升（一三年息率僅1.1厘），不然在機構投資者眼中，估值將更具吸引力。中線策略，可在60元邊或樓下分注買，72元樓上分段沽出，勝在係大紅籌兼且業務性質屬半隻公用股，風險相對可控。