政府近年積極推地，但私人住宅動工量似乎仲未追得上。劉Sir參考屋宇署最新數據，雖然舊年有唔少項目動工，不過，全部都係唔夠1,000伙嘅中小型住宅項目，全年加埋都係得約9,751伙動工，比起前一年少咗約26%。另該署舊年十二月批出咗16份建築圖則，當中5項為住宅及商住項目，包括新地（00016）將軍澳第66D2區限量項目，會作洋房及分層住宅混合發展。

去年私人住宅動工量較前年少二成六。（資料圖片）

最新獲批建築圖則的發展項目

睇番屋宇署截至去年十二月嘅最新數據，原來舊年全年嘅私宅動工量約9,751伙，按年減少大約26%，係過去三年最少。

新地將軍澳項目獲批

劉Sir知道，舊年全年動工項目其實都唔少，都有48個，只係連1個提供逾千伙嘅項目都冇，所以加埋都唔夠1萬伙；而舊年全年落成單位，亦按年減少約18.7%至8,254伙。

雖然舊年私宅動工同落成數字唔多理想，但其實都唔使太悲觀。事關近年唔少政府批出嘅項目都相繼批則。屋宇署舊年十二月批咗16份建築圖則，5項係住宅及商住發展。好似新地喺一二年投得嘅將軍澳第66D2區限量地，獲准發展4座洋房同埋6幢分層住宅，總樓面約56.37萬方呎。

九倉山頂地兩手準備

有發展商為旗下貴重項目擬訂「Plan B」，九倉（00004）嘅山頂加列山道63號重建項目，年前已經獲批准作洋房發展，而項目剛剛又獲批發展1幢8層高分層住宅，提供約4.24萬方呎樓面。

唔通九倉諗住放棄興建洋房？同系會德豐地產常務董事黃光耀就話，山頂發展分層住宅潛力其實都唔錯，所以今次只係做定兩手準備，暫時仲未有最終定案，但會仔細比較邊個方案比較合適。

期內亦有4項商業發展獲批圖則，包括希慎（00014）銅鑼灣新寧大廈重建項目，准建1幢27層高商廈，總樓面約46.24萬方呎；而英皇國際（00163）早年投得嘅灣仔皇后大道東373號酒店項目，亦獲批發展一幢27層高酒店。

另港島南南灣嘅管理公司嘉里物業管理服務有限公司，舊年向城規會申請將南灣對出嘅鴨脷洲海旁道船廠、範圍逾24萬方呎用地改建遊艇中心。不過，規劃署並唔支持，睇怕今日都幾難獲城規會通過。