魚缸Blogger：摩比發展睇位上車

去年聖誕推介過嘅摩比發展（00947），股價眨吓眼已由個半樓下，升到兩蚊水平。集團啱啱發盈喜，預期去年全年將扭虧為盈，原因係內地4G天線產品迅速增長、銷售及分銷開支控制得宜，及4G發牌或令基站天線及射頻子系統產品需求激增。

查實公司去年上半年純利倒退45.6%至779萬元人仔，已經成功扭轉前年下半年業績見紅劣勢，隨住LTE產品銷售比重提升，相信今次報喜市場亦都一早心裏有數，只係覺得嚟緊一年先至會入戲肉，睇番佢喺3G時代的成績表就可以知道。

摩比尋日急升13.8%至2.14元，14日RSI（67）仲有上升動力，蛇年最後一個交易日，即管睇吓仲有無上車機會啦！