大市連跌四日之後，昨日終於有反彈，恒指升180點，重上22,000點關口，以22,141點收市，主板成交683億元。今日係年三十晚，港股得半日市，如果聯儲局議息結果無乜特別壞消息的話，估計蛇年最後一個交易日都可以延續返尋日反彈勢頭。

歐舒丹最新公布的營運數據有改善，支持股價昨日反彈。（資料圖片）

尋日大市回升，內銀股功不可沒，工行（01398）升逾4%，建行（00939）、民行（01988）及招行（03968）亦升逾2%，因由於仍未擺脫下降軌，故投資者暫不宜過分憧憬。

騰訊有力創新高

科網股今年是市場焦點所在，股王騰訊（00700）昨日升5.7%，以532元收市，完全屬大漲小回格局，如果市場氣氛配合，短期絕對有機會突破五十二周高位536元，再創新高。聯想（00992）亦續有追捧，昨日再升多4.58%，以10.96元收市。其他科網股如金山軟件（03888）、IGG（08002）亦分別升4%及6%。其實，好多科網股舊年已累積咗一定升幅，一有咩風吹草動，喺人心虛怯的情況下，跌勢當然會較急，但係佢哋彈起上嚟亦都好驚人，所以呢類股份真係睇你夠唔夠擔跟。

禮拜二阿莊推介隻海螺創業（00586），獲德銀發報告唱好，認為公司有成為內地最大環保企業的潛力，首予公司「買入」評級，更將目標價訂於23元。海螺創業昨日一度升上19.46元高位，最後以18.84元收市，由於呢隻股都幾貨乾，要挾起上嚟可以好快，如果有聽阿莊講撈咗貨，不妨繼續持有，短期要升穿20元關口應該唔難。

歐舒丹（00973）由於盈利表現未如理想，股價自去年一月開始由27元水平反覆下跌，日前一度低見14.98元，創五十二周新低。集團公布了最新營運數據，截至去年十二月底止九個月，銷售額按年升0.3%至8.03億歐元，主要受美國、 中國、俄羅斯及巴西市場推動，而按固定匯率計算，首三季度銷售額增8.7%，增速明顯較上半年度的7.2%快，故支持股價昨日反彈5.4%，以15.8元收市。

雖然歐舒丹銷售增長加快，但由於推廣宣傳開支增加，加上投入資金增設門店，令成本壓力上漲，故集團盈利能否回復增長，才是值得關注的問題。惟股價已累積相當跌幅，加上技術上出現底背馳，故昨日藉銷售數據作出反彈，至於長遠能否重拾升軌，則要視乎全年業績表現如何，但估計短期仍有反彈空間，阻力見於100日線17.84元。