今個星期值得留意的消息，自然係伯南克最後一次主持美國聯儲局議息會議，預期將繼續減少買債規模100億美元，而另一市場焦點，筆者反而留意周三發行價值150億美元的兩年期浮息國債，係財政部十七年來首次推出國債新品種。浮息國債利息以過去十三星期內的貼現率為基礎，每日調整利息而每季畀一次息。財政部仲計劃四、七月同十月都再發行另一批浮息國債。

10年期美債孳息率

財政部推浮息國債，其實係意識到定息國債的吸引力會慢慢下降，因政府擔心投資者會預期未來通脹升溫，而且聯儲局慢慢退市，未來債息將不斷向上。如果係加息周期，浮息債券的吸引力自然上升，於是財政部就諗計，吸引投資者繼續買國債。美國退市速度一旦加快，債息自然抽升，連帶影響樓市繼而影響消費，而經濟復甦未如預期，亦將影響美國企業加大投資的誘因。

喺企業老闆眼中，想見到經濟好先願意加大投資，但喺聯儲局眼中，企業唔願意加大投資經濟亦唔會好。所以推出浮息國債的問題係，萬一聯儲局有信心短期內通脹唔會升溫，或者退市步伐唔會加快導致債息抽升，聯儲局就可以繼續以低成本融資，利息支出唔會加大，呢個相信亦係目前最符合聯儲局利益的做法。

但買咗浮息債的投資者諗住收高息，結果可能失望而回。要喺聯儲局身上賺錢，談何容易？