內地經濟數據以及美國企業業績均遜色，加上市場對於本周聯儲局會議落實的縮減買債規模存憂慮，引發金、股、匯拆倉潮。日股昨日挫2.5%，而A股跌幅則相對細，滬綜指跌1%。看來早前人行突然放水，規模唔細，明顯係有備而來。

今年金價未見得具大幅上升條件，意味金礦股前景仍不太樂觀。(資料圖片)

太陽日誌

港股難逃一跌，恒指裂口低開430點，最終失守22,000點關收市，報21,976點，跌473點或2.1%，大市成交增至893億元，難怪缸邊友都心慌慌！

其實，資金流出新興市場始自去年末季，若然美國的收水規模真係比想像中大，而企業業績又遜預期，美股升勢無以為繼，咁歐、美股都睇唔好，至於新興市場又話風險高，咁資金尚有何出路？

平常心去諗，反正指數呈上落市已有一段時間，搓波搓咗咁耐，來個大波幅洗洗牌，有危才有機。港股有大批中資坐定定維穩，魚缸不乏炒作主題，唔見得跌市就等同世界末日！

大戶屠牛已夠皮

論短線走勢，過去兩個交易日，恒指先後失守250日線及22,000點心理關口，大量牛仔被劏，相信大戶已達屠牛目的。另一角度睇，從上周部分股價急挫的濠賭股，昨日逆市靠穩收市，相信農曆年前大戶製造的一次大龍鳳已告完畢。

若排除美股再度急挫，又或是周內公布的經濟數據與預測值偏離太遠，則春節假前港股會維持在21,800至22,200點水平浮沉，等收浸貨再在季末業績高峰期及季結前才現新方向。

昨日魚缸大風大浪，但仍然唔少逆市奇葩，當中好多都同4G通訊及科網主題有關，如TOM（02383）升9%、中芯（00981）升6%、TCL多媒體（01070）升11%。

至於上周宣布獲阿里巴巴入主，股價急升的中信21世紀（00241），股價亦不見得有太大沽壓，即使排除阿里借殼上市的可能性，但在阿里的牌頭下，相信總比以往「中信」時代好。參考去年內房殼股的玩法，今年科網殼股必有一番作為，而中信21世紀有機會成焦點股！

醫藥市場空間大

除咗科網股之外，昨日醫藥股亦係其中一個逆市走強的板塊，金活醫藥（01110）急升22%，石藥（01093）及四環醫藥（00460）收市分別升1.9%以及4.6%。

而有大手上板的上海醫藥（02607）則跌近半成，有指阿里透過中信21世紀搞醫藥電商直銷業務，或會對如上藥等傳統藥品分銷商不利。惟目前內地醫藥市場可供發展的空間仍廣，而發展醫藥電商直銷業務涉及監管問題，依家就下定論，似乎係言之尚早！

資金尋求避險之所，見昨日金礦股亦有追捧，紫金（02899）同招金（01818）都逆市高收。不過，去年金礦股業績肯定難睇，現價往績市盈率未能反映呢個因素，加上今年金價仍未見得具大幅上升的條件，意味行業前景仍不太樂觀，落場追貨宜提防上車容易落車難！