大市一如所料隨美股下挫，恒指連22,000點關口都頂唔住，最多跌569點，低見21,880點，尾市雖然略為反彈，但全日仍然跌473點，以21,976點收市。

海螺創業從事為水泥廠提供餘熱發電解決方案業務，前景備受市場肯定。（資料圖片）

睇番大市已經連續三日急挫，合共唔見咗1,106點，唔少牛證壯烈犧牲，單係尋日就殺咗121隻恒牛，所以短期再殺落去誘因唔大，而且尋日收市後國壽（02628）發盈喜，料全年純利增1.2倍，相信亦可以令大市氣氛好番些少，估計放假之前，恒指會先喺22,000點水平整固一下。

半新股沽售壓力大

尋日早段大市跌勢咁急，好多股票閒閒哋都跌超過一成，有120隻股票創五十二周新低，當中包括多隻近日上市的半新股，好似米格（01247）、MAGNUM（2080）、中生聯合（03332）同光大銀行（06818）等，至於近排熱炒的手遊股、同彩票股都跌得好急，好似手遊孖寶IGG（08002）及博雅互動（00434），早段分別最多跌12.6及11.9%，但明顯見到有買盤趁低吸納，最後由低位顯著反彈，埋單跌幅收窄至只有5.28%及1.8%。由於科網股屬今年炒作焦點，只要大市氣氛好番，唔難發動新一輪升浪。

相反米格同MAGNUM低位承接力就明顯不足，最後以接近低位2.05元及2.26元收市，跌幅9.6%及8.8%，似乎仲未搵到支持，而且佢哋概念只屬一般，所以投資者想趁低撈貨的話，相信佢哋唔會係最好選擇。

海螺創業（00586）近日亦隨大市調整，昨日更低見17.24元，較上市高位23.55元高位跌咗26%，而且更差唔多跌番去起步位，吸引力明顯增加。海螺創業持有海螺水泥（00914）權益，後者早前發盈喜，料去年淨利潤將按年顯著增長，海螺創業當然可以母憑子貴。

另外，隨着國家對環保重視，其為水泥廠提供餘熱轉化電能的餘熱解決方案業務獲市場垂青，加上未來將會開展垃圾焚燒及綠色建材業務，發展潛力相當可觀。而高盛上周亦發表報告，認為公司可受惠於中國未來加大增加環保投資，料一三年至一五年的盈利複合年增長率可達24%。海螺昨日股價由低位顯著回升，尾市更一度重上18元關，最後以17.98元收市，料初步調整完成，投資者不妨在現水平收集作中線持有。