內地去年GDP增長7.7%，略高於官方所定的目標7.5%，有驚無險，總算超額完成，再次顯示政府高層換屆無礙宏觀政策的持續性。不過，心水清者都知，去年經濟增長主要靠投資推動，錢從可來？地方債、企業債，投資雖然增多，市場流動性卻依然偏緊。如何從去槓桿同經濟穩定增長之間取得平衡，仍是各財金官員的重大挑戰。

內銀股前景未明，相反從事不良資產業務的信達，生意唔憂做。（資料圖片）

太陽日誌2014/1/21

下周五就係大年初一，長假氣氛開始在魚缸浮現，滬綜指昨日失守兩千點心理關口，兩市成交創13個月新低。隔夜SHIBOR升107點子，七日SHIBOR升155點子，今日又有八隻新股掛牌，A股承壓能力備受關注。

市況趨靜宜先減磅

港股被A股拖住後腳，上晝仍能撐在23,000點樓上，但下晝便告失守，埋單唔見204點，收報22,928點，主板成交660億元。在下相信，春節前市況都唔會有咩大突破，恒指會維持在22,500至23,200點水平上落，下周交投更會進一步轉靜，炒家有利潤宜見好識收，分段減磅過肥年，唔使下下玩到最後一刻先收手。

為打擊影子銀行，整頓內銀業，降低信貸市場風險，今年當局將繼續盯緊銀行業，並加強監管及規範影子銀行。時值農曆年尾，內地不少信託產品快到期，但近日就傳出內地中誠信託推出、快將到期的30億元人仔信託產品，或無法按期變現，作為託管行的工行（01398）責任如何更成市場焦點。

內銀股未有耐見底

雖則話，目前內地近八成市場流動性來自銀行體系，暫看單一信託違約事件對整體市場流動性影響有限，但心理上投資者對內銀及信貸市場風險水平警覺性必會提高，令內銀股估值將雪上加霜。更何況，一旦事件中信託持有人最終可獲全數歸還本金，可能會成壞先例，為內銀股添上一個新的不明朗因素。

最近內銀A股紛紛「破淨」（即跌穿每股資產淨值或市帳率跌穿一倍），正進一步確認內銀股已被打落「凡間」，而非見底訊號！

昨日內銀股全線低收，可以繼續放輕呢個板塊。不過，內銀股佔主要股指比重大，唔少基金都要硬着頭皮繼續坐貨，也許適量持有從事經營不良資產的金融股，係對沖內銀持股風險的途徑之一，皆因呢類金融機構生意唔憂做！

中國信達（01359）在上月中旬掛牌，招股價3.58元，股價好快見4元樓上，但受制於5元關。據講唔少基金趁調整積極收集，至近日多家大行加入唱好行列，瑞信將其目標價定在6.14元，野村最樂觀，睇7元。

昨見信達股價逆市破頂，高位見5.44元，看來基金大戶經已收夠籌，股價隨時入直路，踩油開快車，就當佢內銀「Put」咁炒，坐6望7！