距離聯儲局月底議息尚有兩星期，一月的就業數據又鐵定在議息後才曝光，故上周五晚的新屋動工及消費信心指數，就變得特別受注目，好為月底聯儲局是否繼續退市步伐一探端倪。結果去年十二月新屋動工量跌9.8%，至99.9萬間，主要係十一月基數較高，及十二月北美天氣轉壞造成，總體上，還是高過市場預期。

太陽日誌

綜合大行預測中視金橋業績（人民幣）

不過，一月美國消費者信心卻由十二月的終值82.5，回落至80.4，跟市場預期的升至83.5相反。專家解釋係美國中下階層對經濟復甦期望回落影響。

數據公布後，十年期美債息輕微回順至2.82厘，道指先跌後回，升41點。值得留意係，近期炒到出煙的科網股唔少呈現回吐，拖累納指回落，美國上市的中國網股好似百度、新浪同奇虎360，即市調整幅度唔細，小心本周冷風吹襲騰訊（00700）。

科網股熱炒有理由

好多股民只係見到騰訊過去一年累積升97%的誇張表現，但其實科網熱並非中國獨有，過去一年（截至上周四），一些領袖科網股累積升幅一樣唔講得笑，如日本軟庫（Softbank）升198%、雅虎升100%、facebook升89%、Google升62%。

史提芬認為，經歷○八年金融海嘯後，實體經濟增長不及虛擬經濟是事實，經歷二○○○年科網泡沫爆破淘汰後，今時今日科網業已由從前的百花齊放，開始呈現寡頭壟斷狀態，君可見，以前search engine有N咁多個選擇，今日已漸漸演變成Google一網獨大，全球市佔率達六成七，在壟斷地位唔易動搖下，於股市中含金度高亦都好正常。

大市升勢難成氣候

上周五恒指再升146點，收報23,133點，但升勢側重於兩隻藍籌博彩股及騰訊身上，三隻股票合共貢獻指數104點，反之內銀股因A股弱勢未改，全線向下。儘管恒指似乎在23,000點搵到支持，但A股在恒指內的重磅國企一日唔轉勢，升勢始終難成氣候，仲要硬頸炒市唔炒股（期指、指數牛熊證），恐怕連搵兩餐都好難。

短期就算騰訊要回，中資TMT股始終係炒賣焦點，本地掛牌的內地文化媒體股選擇唔多，中視金橋（00623）估值長期偏低，不排除會被熱錢睇中，具冷敲價值。中視金橋簡單講係央視的廣告分銷商，一四年PE唔夠7倍，息率預期有6.4厘，估值咁平，皆因市場成日怕佢同央視的合作關係有變，形成長期折讓。查實公司同央視有十幾年的業務往來，亦連續多年獲選為十佳廣告代理，分手風險實情唔高。

本來習總打貪，以為電視廣告會首當其衝，殊不知最近一四年的招標會預售額不跌反升，仲有兩成進帳。另外，中視金橋的管理層亦開始關注其業務集中問題，近年加強廣告製作及內容創意收入之外，也完成電視、網絡及手機跨媒體的廣告發展戰略，尋求與其他媒體合作。

其股價由去年十一月的7.75元高位掟番落5元邊搵到支持，上周五收報6.07元，同高位有段距離，最緊要估值夠平，如果手機及網絡廣告做出成績，股價爆炸力可以好勁。