隔晚借十二月零售銷售增幅好過預期，道指反彈，華爾街進入第四季業績期，暫見打頭陣的富國及摩通核心收益都比預期好，又睇吓份靚成績表，可唔可以抵銷上星期麻麻哋嘅就業市場數據。

市場憧憬蒙牛快將嬰兒奶粉相關業務注入雅士利。（資料圖片）

太陽日託2014/1/16

綜合大行預測雅士利業績（人民幣）

港股尋日升110點，報22,902點，沽空佔主板成交比縮至8.3%，是一月二日以來最低。連日在22,600至23,000點之間折騰，看來連淡友及專攻長短倉的大戶，都抱住一動不如一靜策略，等A股確認調整完成至算。

信達到價大行審慎

市有市悶，股仔照炒，一手中籤率得3%，僅僅高過六合彩安慰獎（1.6%）些少的米格（01247），一如其他分貨分到散的超購王，開得高收day low，由開市一刻最高點3.46元碌落2.81元收市，磨爛蓆居然仲有23%執（招股價2.28元），都算係咁。

啱啱過咗掛牌後blackout，尋日多間外資行開始發中國信達（01359）的研究報告，大摩及高盛睇5及5.1元，評級為「大市同步」及「中性」，花旗及瑞銀不約而同睇6元，建議「買入」，野村最牛睇7元，反而牽頭幫信達上市的美銀美林，保守睇5.2元，評級「中性」，認為信達前景雖好，不過掛牌至今股價累積勁升四成四，以1.6倍市帳率計，已是街上第二貴的內地金融類股份，僅次於中信行（00998），以基本因素而言，短期進一步被大行re-rating的機會唔大。

翠華（01314）大股東及高管於收市後以4.99至5.1元，折讓5.9至7.9%批1.16億股，套現6.28億元。似乎連大股東都認為，47.3倍PE短期已經到價。

合生元發債借平錢

手遊股回吐，市場有失去焦點之感，建議睇番醫療及乳業等具基本因素支持的股票，兩隻奶粉股近日調整咗唔少，尋日合生元（01112）大沽空下跌1.8%，估計同發零息債，對沖基金的買債沽股的套戥活動有關。

食住放寬一孩政策條水，合生元啱啱同杭州可靠護理合作，進軍嬰兒紙尿片市場，得唔得仲係其次，吸引到在下嘅仲係佢發五年期25億人仔債券，換股溢價27.5%，息率2.875厘，真係好抵（講緊借錢果個），多少反映接貨者的樂觀。

而另一間奶粉公司雅士利（01230）同樣有動作，早幾日把未落成啟用的鄭州工廠，一炮過賣畀阿媽蒙牛（02319），套現3.7億元人民幣，賺3,078萬元人民幣。有分析員估今次會係兩母子未來分工的第一步，蒙牛好快會將嬰兒奶粉相關生意及分銷業務，放入雅士利。有國家隊撐腰，早前復牌貨乾炒上5.54元，計落已回番15%，近半個月低位支持逐漸上移，睇落走勢唔錯。