Fundman睇市：港交所投機炒一轉

今時今日，間間央行都有意無意，想盡辦法做低匯價刺激出口。目下唯獨得中國因為○九年4萬億元人民幣救經濟搞到一鑊泡，加上地方債務問題同埋四大行老奉要錢伸手，迫使人行出手整頓，結果中國走在新興市場之先，最早退市，令到熱錢湧晒去賭人民幣升值。

近期市場做好心理準備，迎接人民幣兌美元由六算走到五字頭水平，如果遊戲規則真係匯率同股市相對的話，近期A股咁鬼弱勢，除咗因為IPO重啟之外，相信同高匯價亦不無關係。

手遊股終見回吐

隔晚華爾街股市跌179點，好彩滬綜指仲守住二千點關口，港股尋日低開後跌幅收窄，最後跌97點，收報22,791點。尋日提過TMT狂潮，連文化傳信（00343）都開車真係有些少風險，話口未完，手遊股終於要回，IGG（08002）跌12.3%，博雅互動（00434）跌13.5%，網龍（00777）則跌6.1%，雲遊（00484）亦跌5.6%，總之係升得多，跌得多。

對於預測內地網股今浪可以炒幾耐，老老實實，史提芬信馬雲都唔會信班投行大孖沙（睇番以前阿里巴巴上市同私有化時機的拿捏，大概可知一二）。傳聞中，阿里巴巴五、六月可以上到，照計冷靜番一排，手遊股及其他網股都係要睇番。

講開阿里巴巴，賓架界吹風真係愈嚟愈誇張，講到以介乎25至30倍的一五年預期市盈率上市，招股市值隨時去到兩千億美金，即1.56萬億港元，換句話，一開波已經同市值相若的中移（00941）咁高咁大，亦僅次於滙控（00005）及工行（01398），而阿里加埋騰訊（00700）兩隻巨無霸，市值達2.5萬億港元，對一眾網絡股當然發揮到「成行成市」的作用。

業績表現勝預期

於未來幾個月，相信阿里概念受惠股，仲係會陸續浮現。史提芬諗到較正路的肯定係港交所（00388），事關個市就算唔升唔跌，整體港股市值起碼即時多咗5至6%，仲未考慮好似IGG、博雅一類炒作受惠股對整體大市成交的拉動作用。

首三季港交所賺35.28億元，升9.6%，因為投資收入較預期高以及稅項安排，業績比大行估計好，從近期靜市成交都有六至七字頭，似乎去年第三季日均成交552億元有可能見底，股價最近落番去125至126元，亦即係去年十一月中爆升前的起步位，加埋幾乎間間大行都唱淡今年中港股市，股價已經充分反映悲觀情緒，在下認為現價反而有投機吸納睇一至兩季的吸引力。