美股前晚低收，昨日港股亦難免一跌。早前熱炒的手遊孖寶IGG（08002）及博雅（00434）同跌逾一成。資金轉打遊擊，成為中移（00941）手機支付彩票業務平台運營支撐方的彩票股華彩（01371），股價狂飆，高位見0.68元，收報0.66元，升32%，成交多達6.83億元，比中國人壽（02628）及和黃（00013）成交都要多！

受惠內地龐大的電網建設及鐵路投資，賽晶電子生意唔憂做，近日更發盈喜，難怪受到股民青睞。(資料圖片)

阿莊100萬元投資組合

去年股價飛升，被股民冠以「長城飛車」之名的長城汽車（02333），踏入今年卻變成「長城倒車」，因旗下新產品要延遲推出市場，被券商大削目標價，尋日股價一度急挫兩成，收報34.45元，跌12%，成交達30億元，睇落有排療傷，莫買當頭跌。要買汽車股，寧揀比亞迪（01211），股價回落至31至32元水平又係吸納時。

半新股熱潮未退

半新股熱潮未退，組合持有的中國信達（01359）抖過氣後，尋日創新高5.2元，收報5.14元，升4.6%。執筆時見米格（01247）暗盤價曾較招股價升七成，正在招股的Magnum（02080）認購反應亦十分熱烈。在目前唔上唔落的市況中，新股熱能持續，確屬異數！上半年又有兩隻巨型IPO──雙匯同阿里巴巴等住掛牌，可帶動港股市值同交投量上升，港交所（00388）同券商股都可得益，只是港交所拖住件LME，買券商股似乎較簡單直接，其中海通國際（00665）股價落到3.6至3.8元承接區，中線值博。

今年業績有保證

除半新股之外，盈喜股亦受追捧，好似近日發盈喜的賽晶電子（00580），尋日高位去過0.96元，收報0.89元，升5.9%，成交3,010萬元。翻查資料，賽晶主要從事製銷電子電力部件，應用於鐵道運輸裝備及電網輸配電等領域，公司在一○年十月上市，當時招股價1.93元，翌年業績見紅，一二年成功止蝕，去年上半年賺3,000萬元人仔，近日公司就去年度業績發盈喜，可確認恢復盈利增長動力，去年股價由首季低位0.445元上番年底高位1.03元，足以顯示重獲投資者信心。

去年內地有四條特高壓交流、三條特高壓直流輸電線路建設計劃，鐵路投資新線超過五千公里，賽晶得益於兩大行業發展，去年七月取得9,000萬人仔新合同，九月又取得北車4,000萬人仔合同以及國家電網公司約值1.1億元人仔合同，今年業績有保證。短線股價回落至0.8元樓下唔怕買，中線先睇1.2元。