過去幾年轉戰工廈市場嘅「舖王」鄧成波（波叔），對舖位始終餘情未了，尤其係一線靚舖，佢啱啱用6億翻兜回購銅鑼灣軒尼詩道482號國美電器前租用嘅地下至3樓等巨舖，以及購入旺角基隆街1至3號地舖及閣樓至1樓，涉資約1.6億元。同時有代理報料，話波叔仲傾緊灣仔莊士企業大廈地下至3樓巨舖。若果成事，上述3項物業合共涉額差唔多13億元。

剛易手的軒尼詩道前國美電器租用巨舖，面積共約1.7萬方呎。（資料圖片）

鄧成波剛購入或洽購中的舖位

波叔同劉Sir講，上述軒尼詩道地庫、地下及1至3樓大批零售樓面，早喺一○年中左右以約3.5億元賣出，依家再回購，原因係睇好一線街零售大樓面供應少之外，亦認為今年零售業將會有好表現，所以有咁嘅決定。

回報2.8厘算不俗

聽代理講，上址面積約1.7萬方呎，之前由國美電器租用，月租約83萬元，約一年前搬出後，早前畀間大型運動用品公司洽預租，月租約140萬元，呎租80多元，升幅近70%，即租金回報約2.8厘，一線街舖計，回報率已算唔錯。

是次交易涉及雙倍印花稅約5,100萬元，較一○年賣畀兆安李太嗰口價，物業約四年升值一倍。

而另一單刁係旺角基隆街1至3號地舖及閣樓至1樓，個舖市值大約1.6億元。聽區內代理報料，原來波叔喺該舖附近有物業，相信今次添食，會諗住有大搞作。有經紀話，波叔同時間傾緊灣仔駱克道382號莊士企業大廈地下連1至3樓，上址依家市值約6億元。

另外，有消息指，上述莊士企業大廈樓上十多層寫字樓，依家亦獲另一投資者洽購全數樓層，涉資約3.6億元，呎價約9,000元。

翠華貴77%租駱克道

另一方面，銅鑼灣部分人流旺嘅街舖唔憂租，原由「阿一鮑魚」租用嘅該區駱克道485號地下至3樓，舊年九月租期屆滿後搬出，今個月初即獲翠華茶餐廳（01314）承租，首五年月租122萬元，呎租約170多元，較前租金升近77%，而之後嘅五年月租146.4萬元。