上星期，美國公布一三年最後一份就業數據，十二月失業率意外地回落到6.7%的五年新低，但非農職位增長得7.4萬個，是近三年來最少，亦遠遜市場預期，勞工部解釋惡劣天氣影響，是新增職位比十一月大減的主因。

港樓量跌價不跌的僵局，可能是一個長期現象。(資料圖片)

太陽日誌201/1/13

數據公布後，聯儲局鷹派委員，聖路易斯聯儲銀行主席布拉德（James Bullard）話失業率下跌而新增職位減少，認為聯儲局政策唔應該只按個別月份數據作決定。不過，現實世界銀紙仲係最老實，十年美債息回落近0.1厘至2.86厘收市，反映債券玩家對聯儲局一月是否再減100億美元買債規模，開始有分歧。

專家估計，美國經濟復甦大約需要每月20萬份的新增職位，人人以為一三年美國經濟復甦勢頭更見確認，實質全年平均計，每月新增職位18.3萬份，唔比一二年的18.2萬份改善好多。聯儲局主席伯南克將失業率6.5%同退市掛鈎，事後補鑊話即使見6.5%，亦唔一定要急着加息！

就業數據利港股

新興市場股市，尤其中港兩個包尾大幡，去年受累於美國退市預期，資金持續流出，故上周美國就業數據公布後，期指客反而鬆一口氣，上周五夜期抽高，收22,986點，較恒指高水，顯示今日個市有機會開高。

常言道一年之計在於春，年初基金投資組合的變化，多少預示基金經理對嚟緊一年的股市前瞻，非指數成分股，幾乎全人類都睇實中國新經濟股，互聯網、手遊、環保及新能源。今日反而寫一寫成分股，年初至今恒指跌1.7%，50隻藍籌中僅18隻跑贏指數，唔使講大家都估到兩隻博彩股加埋騰訊（00700）的鐵三角必屬領先股份，銀娛（00027）短短十幾日，累積升9.8%，贏指數半條街。

內房極具吸引力

另一可能是最壞時刻已過的鳳凰股，有百麗國際（01880）、利豐（00494）及華潤電力（00836）。兩隻內房，華潤置地（01109）以及中國海外（00688）亦分別有約3.6%及2.2%進帳。從一三年熱爆的銷售數據，以及暫時見普遍都訂得頗樂觀的一四年銷售目標，大部分內房股已極為吸引。

較意外是本地地產股，新世界（00017）、恒地（00012）、信置（00083）、新地（00016）及恒隆地產（00101），幅度介乎升2.3%至跌1%，表現輕微好過指數。

最近有風水大師話八運（二○○四至二○二三年）港樓唔會大跌，堪輿學非在下杯茶，不過史提芬認同，新興市場產能過剩，將令成熟市場通脹長期低企，美國退市亦係講易行難，低息令香港業主繼續享高強持貨能力，而且仲要考慮係無上限的香港人口政策，內地更多「大款」來港定居，港樓量跌價不跌的僵局，可能是一個長期現象。

不過，○八年地產股開始同樓價背馳，好似新地同恒地，只及當年高位六成許，這個情況殊不尋常，隨着發展商開始向買家提供彌補額外稅付的補貼以促成成交，可見今年地產股就算未必大升，但資產折讓貼近歷史高位的情況，看來有機會改善。